भांगरभूंय | प्रतिनिधी
विजय भिकेः सरकारी पयशांचो दुरुपेग चलयिल्ल्याचो आरोप
भांगरभूंय । प्रतिनिधी
म्हापशें: गोंयांत ड्रग्जाचो वेव्हार पाताळटा. विद्यार्थ्यांच्या कथीत अपहरणांच्या वावड्यांक लागून पालकां मदीं भिरांतीचें वातावरण आसा. हाचे कडेन लक्ष दिनासतना सरकार आपल्या फुडाऱ्यांचें ‘सेलेब्रेशन’ करता. हे फुडें सरकारी पयशांचो दुरुपेग केलो जाल्यार काँग्रेस कार्यकर्ते कार्यावळीचे सुवातेचेर काळे बावटे दाखयतले, अशी शिटकावणी काँग्रेस फुडारी विजय भिके हांणी सरकाराक दिल्या.
म्हापश्यां पक्षाच्या जिल्हो कार्यालयांत आयोजीत पत्रकार परिशदेंत भिके उलयताले. तांचे वांगडा म्हापशें गट समितीचे सरचिटणीस सचीन किटलेकार आनी सांत आंद्रेंचे गट अध्यक्ष मनोज फाळकार हाजीर आशिल्ले.
घातक अशा ब्लॅक कोकेन सारकिल्ल्या ड्रग्जाची गोंयांत तस्करी जाता, अशें मुंबयच्या एनसीबीचे कारवायेंतल्यान उक्तें जालां. गोंय हें संवसारीक ड्रग्ज केंद्र जावपाक लागलां. ड्रग्ज आनी गुन्यांव हाचे बगर लोकांक आयज दुसरी बरी खबर मेळना. भाजपा फुडारी आनी कार्यकर्त्यांचो हस्तक्षेप वाडिल्ल्यान पुलीस यंत्रणा निरशेल्या. सरकार ड्रग्ज पेडलर्स आनी ड्रग्ज वेव्हाराक आळाबंद हाडपाक पुराय अपेशी थारल्या, असो आरोप भिके हांणी केलो.
विद्यार्थ्यांचें कथीत अपहरणांचे प्रकार घडटात. शारांनी चड करून विद्यालयांच्या वाठारांतल्या रस्त्यांचेर सीसीटीव्ही कॅमेरा नाशिल्ल्यान ह्यो वावड्यो काय खरी खबर हें कळना. हाकाच लागून विद्यार्थी आनी पालकां मदीं भिरांत पातळ्ळ्या. सरकारान सोपूत विधी तशेंच प्रधानमंत्र्याचो वाडदीस ह्या सारकिल्ल्या कार्यावळींक कोट्यांनी रुपयांचो इबाड करचे परस लोकांच्या तशेंच शालेय विद्यार्थ्यांचे सुरक्षे खातीर तशेंच गुन्यांवकारी आळाबंदा हाडचे खातीर सगळ्या भौशीक सुवातांचेर बऱ्या दर्ज्याचे सीसीटीव्ही कॅमेरा लावचे, अशी मागणी भिके हांणी केल्या.
मायकल लोबोक ताब्यांत घेवचोः भिके
फाटले पणजी मतदारसंघ पोटवेंचणुके वेळार आमदार मायकल लोबो हांणी ड्रग्ज पेडलर्सांचीं नांवां जाहीर करपाची घोशणा केल्ली. पूण अजून मेरेन तांणी नांवां जाहीर करूंक नात. मंत्रीपद दिवन ताचें तोंड बंद केलें. ड्रग्जाचो नायनाट करचे खातीर पुलीस गुन्यांव फांट्यान आमदार लोबो हांकां ताब्यांत घेवन ड्रग्ज पेडलर्सांची नांवां वदोवन घेवचीं, असो उलो विजय भिके हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
