भांगरभूंय | प्रतिनिधी
भांगरभूंय । खबरां मेज
पणजीः गोंय पर्यटन खातें आनी गोंय पर्यटन उदरगत म्हामंडळान म्हायती खात्याच्या सहकार्यान तामिळनाडूंतल्या मदुराय शारांत आयोजीत केल्ल्या गोंय@60क रोड शोक लोंकां कडल्यान व्हड प्रतिसाद मेळ्ळो. उत्तर भारतांत अहमदाबाद, उदयपूर आनी वाराणसी उपरांत दक्षीण भारतांत आयोजीत केल्लो हो पयलो रोड शो आशिल्लो.
पर्यटन संचालक निखिल देसाय हाचें हस्तुकीं ह्या रोड शोचें उक्तावण जालें. ह्या वेळार तामिळनाडूच्या पर्यटन खात्याचे जिल्लो पर्यटन अधिकारी एसएम श्रीबालमुरूगम, जीटीडीसीचो उपसरवेवस्थापक आनी पीआरओ दीपक नार्वेकार, म्हायती अधिकारी प्रकाश नायक, सहाय्यक म्हायती अधिकारी शाम गांवकार, पर्यटन खात्याचो मार्केटींग वेवस्थापक प्रसाद कवळेकार हाजीर आशिल्ले.
सैम सोबीत गोंयांत देशी तशेंच विदेशी पर्यटक व्हडा संख्येन येवचे हे खातीर देशांतल्या जायत्या शारांनी रोड शो आयोजीत करता. मदुरायच्या रोडशो वरवीं गोंयां विशीं जायती म्हायती करून घेवन गोंयांत येवपाचें आमंत्रण देसाय हांणी तामिळनाडूच्या लोकांक ह्या वेळार दिलें.
तामिळनाडून रोडशो आयोजीत करपा खातीर मदुरायची निवड केल्ले खातीर तामिळनाडू पर्यटन खात्याचो जिल्हो पर्यटन अधिकारी एसएम श्रीबालमुरूगन हांणी खोस उक्तायली. गोयंची गिरेस्त अशी सांस्कृतीक परंपरा, खाणे, सरबराय आनी पर्यटना कडेन संबंद आशिल्ल्या हेर गजालींची रोडशोक लागून आमकां म्हायती मेळपाक शकली अशें तांणी सांगलें.
देशांत वेगवेगळे कडेन स रोडशो आयोजीत करपाचें थारलां. तातूतले चार शो जाल्यात. केरळांतल्या तिरुवनंतपूरम आनी कर्नाटकांतल्या म्हैसुरात फुडले शो जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
