भांगरभूंय | प्रतिनिधी
मुख्यमंत्री डॉ. सावंतः मणिपाल हॉस्पिटलाची ‘रक्षक- द सेव्हियर’ मोहीम सुरू
भांगरभूंय । खबरां मेज
पणजीः हालींच्या काळांत गोंयांत रस्तो अपघातांत वाड जाल्या. दर म्हयन्याक सरासरी 200 अपघात जातात. गोंयकारांक अशे आपत्कालीन स्थितींत प्रभावी प्रतिसाद दिवचे खातीर वैजकी नदरेन प्रशिक्षीत करपाची गरज वाडल्या, अशें मुख्यमंत्री डॉ. प्रमोद सावंत हांणी सांगलें.
संवसारीक काळीज दिसा निमतान गोंयच्या मणिपाल हॉस्पिटलान वैजकी आपत्कालीन स्थितीक फुडो करचे खातीर तशेंच गोंयकारांक आपत्कालीन स्थितींत प्रतिसाद दिवपाक, सक्षम करपाच्या उद्देशान बेसीक लायफ सपोर्ट क्रिया शिकोवपा खातीर रक्षक- द सेव्हियर’ ही नवी मोहीम सुरू केल्या. गोंयांतल्या मणिपाल हॉस्पिटलाच्या ‘रक्षक- द सेव्हियर’ मोहिमेच्या पयल्या सत्राचें उक्तावण केले उपरांत मुख्यमंत्री उलयताले. हातूंत गोंय पुलीस दळ, येरादारी विभाग, कदंब येरादारी म्हामंडळ लिमिटेड, गोंय मनीस संसाधन उदरगत म्हामंडळ, तशेंच गोंय उजो पालोवपी आनी आपत्कालीन सेवेंतल्या 125 दादले आनी बायलांक प्रशिक्षण दिलें. विवीध भौशीक मळा वयल्या (केंद्र आनी राज्य सरकारी विभाग) तशेंच खाजगी समुदायांतल्या लोकांक मुळावी जीण समर्थन वा बाएलएस सारकिल्ल्यो जीव वाटावपी सेवा आनी कुशळटायेचें प्रशिक्षण दिवप हें रक्षकचो उद्देश आसा.
शेंकड्यांनी जीव वाटावपाक मजत करपी मणिपाल हॉस्पिटलान हो उपक्रम सुरू केल्ल्यान आपल्याक खोस जाता, अशें मुख्यमंत्र्यान ह्या वेळार सांगलें.
मणिपाल हॉस्पिटल गोंयचे संचालक सुरेंद्र प्रसाद हांणी सांगलें, गोंयकारां मेरेन रक्षक वा आपत्कालीन स्थितींत जीव वाटावपाचें प्रशिक्षण दिवपी ह्या म्हत्वाचे मोहिमेचें उक्तावण मुख्यमंत्री डॉ. प्रमोद सावंत हांचे हस्तुकीं जाल्ल्यान आपल्याक खोस भोगता. आपत्कालीन स्थितीचो विचार केलो जाल्यार एकादे घडणुके उपरांत प्रतिसाद दिवपी घडणुकेचे सुवातेचेर पावचे आदलो वेळ जीव वाटावपा खातीर म्हत्वाचो आसता. ताका लागून लोकांक मुळावें जीण आदार क्रियांचें प्रशिक्षण दिवन पयलीं प्रतिसाद दिवपी म्हूण वावर करपाक उर्बा दिवप हें रक्षक मोहिमेची मोख आसा. मणिपाल हॉस्पिटल गोंयचे एचओडी हरी प्रसाद हांचे सयत कुशळटाय उदरगत आनी उद्देजकता संचालनालयाचे दीपक एस. देसाय, सांताक्रूजचे आमदार रुडोल्फ फर्नांडीस, उजो जपालोवपी आनी आपत्कालीन सेवा संचालक नितीन रायकार, गोंयच्या मणिपाल हॉस्पिटलाचे वैजकी अधिक्षक डॉ. आदित्य गोसावी, मणिपाल हॉस्पिटल गोंयचे ऑन्कोलॉजी विभागाचे मुखेली डॉ. शेखर साळकार आनी मणिपाल हॉस्पिटल गोंय आनी मणिपाल हॉस्पिटल मंगळूरच्या आपत्कालीन आनी ट्रॉमा विभागाचे मुखेली डॉ. जीधू हांणी आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
