भांगरभूंय | प्रतिनिधी
बांगलादेशी घुसखोराक वाळपय अटक; पंचायतीची बेकायदो कावला अड्ड्याचेर कारवाय
भांगरभूंय । प्रतिनिधी
वाळपयः सत्तरी म्हालांत म्हावूस पंचायतींतल्या नागवें वाठारांत कावलां अड्ड्याचेर काम करपी बिलाल अन्वर आखोन हाका आतंकवादी विरोधी पंगडान ताब्यांत घेतलो. चवकशे उपरांत ताचो देशविरोधी कारवायांनी आस्पाव आशिल्ल्याचें स्पश्ट जालें. ताका लागून ताचेर गुन्यांव दाखल केलो आनी ताका रितसर अटक केली. तो खूबशा घडणुकां फाटल्यान मास्टर मायंड आशिल्ल्याचें स्पश्ट जालां.
मेळिल्ले म्हायती प्रमाण गोंयांत बांगलादेशी घुसखोरांक धरून तांच्या मायदेशांत धाडपाची मोहीम आतंकवादी विरोधी पंगडान हातांत घेतल्या. दिवचले चार बांगलादेशी घुसखोरांक अटक केल्ली. तांचे कडेन हे संबंदांत खोलायेन चवकशी केले उपरांत तांचो संबंद वाळपय आशिल्ल्याचें स्पश्ट जालें. ते उपरांत पुलिसांनी नागव्यां कावलां अड्ड्याचेर फाटलीं 12 वर्सां काम करपी बिलाल अन्वर आखोनाक ताब्यांत घेतलो. ताची चवकशी केले उपरांत ताचो खूबशा गुन्यांवकारी घडणुकांनी हात आशिल्ल्याचें स्पश्ट जालें. हे संबंदांत वाळपयच्या पुलीस स्टेशनाचेर ताच्या आड गुन्यांल दाखल केलो आनी ताका रितसर अटक केली.
पुलिसांनी आखोनाची खोलायेन चवकशी केली तेन्ना, सत्तरी म्हालांत खूबशा वाठारांनी जे घुसखोर बांगलादेशी रावतात तांचीं आधार कार्डां तो करतालो अशी ताणें म्हायती दिली.
तीं बनावट आधार कार्डां करपा खातीर आखोनाक जांणी मजत केल्या तांचीं नांवां आखोनाचे चवकशे वेळार भायर येवपाची शक्यताय आसा. ताका लागून खूबशे थळावे लोक लेगीत बंदखणींत वचपाक शकतात, अशा म्हायती मेळ्ळ्या. जे घुसखोर बांगलादेशी थेट गोंयांत येताले, तांचो आखोना कडेन थेट संपर्क जालो, तांकां आखोनान अभय दिवपाचे नदरेंतल्यान वेगवेगळ्या पांवड्याचेर यत्न केल्ल्याचें उजवाडाक आयलां. हातूंतली म्हत्वाची गजाल म्हणल्यार ताणें सुमार 20 घुसखोरांक आधार कार्डां करून दिल्ल्याचें स्पश्ट जालां.
ज्या घुसखोरांक रावपा खातीर सुवात नाशिल्ली तांकां वेगवेगळ्या वाठारांनी सुवात मेळोवन दिवपा खातीर लेगीत आखोनान मजत केल्या, अशें मेळिल्ले म्हायती वयल्यान कळ्ळां.
आखोन हो नागव्यां फाटल्या 12 वर्सां सावन कावला अड्ड्याचेर काम करता. ताची वागणूक दुबावाची आसिल्ली. अशें आसून लेगीत थळाव्या पुलिसांक हे विशींची कांयच कशी म्हायती मेळूंक ना, असो प्रस्न थळाव्या लोकांनी उपस्थीत केला. तशेंच ह्या प्रकरणा संबंदांत पुलिशेचे भुमिकेचेर तांणी दुबाव उक्तायला.
मजगतीं, म्हावूस पंचायतीन नागव्यां फाटल्या 12 वर्सां सावन चलपी बेकायदो कावला अड्याचेर कारवाय करून तो बंद केला. त्या कावला अड्ड्याक पंचायतीचो परवानो नाशिल्लो. ताका लागून तो बेकायदो आशिल्ल्याचें पंचायतीन स्पश्ट केलां. त्या कावला अड्ड्याक कायदेशी नोटीस दिवन तो बंद केला.
‘ह्या प्रकरणांत पुलिसांनी गंभीरतायेन लक्ष दिवचें’
नागव्यां कावलां अड्ड्याचेर काम करतना बिलाल आखोन देश विरोधी कारवायांनी सक्रीय आशिल्लो, अशें चवकशेंत स्पश्ट जालां. ताचे कडल्यान आनीक म्हायती काडून घेवपा खातीर पुलिसांनी यत्न चलयल्यात. ताचे कडल्यान खूबशी म्हत्वाची म्हायती मेळपाची शक्यताय आसा. आखोनाचे म्हायती वयल्यान गोंयांत बेकायदो रावपी बांगलादेशी घुसखोरांक सोदून काडप पुलीस यंत्रणेक सोंपें जातलें. ते नदरेन गंभीरपणान लक्ष दिवचें, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
