भांगरभूंय | प्रतिनिधी
पणजीः गोंयांत फाटल्या वर्सां सावन सरकारी आनी अनुदानीक अशा वट्ट 367 शाळांनी यत्ता 6 वी ते 8 वेच्या विद्यार्थ्यां खातीर कोडींग आनी रोबोटिक्साचो अभ्यासक्रम सुरू केला. गोंयांतल्या 520 शिक्षकांनी ह्या विशयांचें प्रशिक्षण घेतलां. अशें आसलें तरीय राज्यांतल्या कांय सरकारी माध्यमीक विद्यालयांनी कंप्युटर शिक्षकूच ना. जाल्यार कांय शाळांनी कंप्युटर लेगीत ना. अशा शाळांनी विद्यार्थ्यांक हो अभ्यासक्रम कसो शिकोवचो, हो प्रस्न आसा.
गोंयांत वट्ट 31 माध्यमीक विद्यालयां आसात. मात ह्या शाळांनी कंप्युटर शिक्षक ना. कांय शाळांक कंप्युटर दिल्यात, मात ते तशेच पडून आसात. गांवगिऱ्या वाठारांनी इंटरनेट कनेक्टिव्हिटीची समस्या आशिल्ल्यान विद्यार्थ्यांक कंप्युटराच्या माध्यमांतल्यान शिकोवप कठीण जाता. ताचेर उपाय म्हूण कांय शिक्षक स्वताचो लॅपटॉप घेवन येतात आनी विद्यार्थ्यांक मोबायल घेवन येवपाक सांगतात. अशे तरेन ते ह्या विशयाचें शिक्षण दितात. शाळांतल्या ज्या विद्यार्थ्यां कडेन मोबायल ना ते ह्या शिक्षणा पसून पयस उरतात.
सध्या विवीध शाळांक कोडींग आनी रोबोटिक्साचीं उपकरणां दिवपाक सुरवात केल्या. कंप्युटराचें ज्ञान, डिझायन थिंकींग आनी प्रोग्रामींग कुशळटाय विकसीत करप ह्या उद्देशान हो अभ्यासक्रम सुरू केला. पूण जर विद्यार्थ्यांक प्रात्यक्षीक करपाकूच मेळ्ळें ना जाल्यार तांची कुशळटाय कशी विकसीत जातली?
सध्या शिक्षण विभागान सगळ्या शाळांचें सर्व्हेक्षण करून कंप्युटर प्रयोगशाळे खातीर सुवात आसा काय ना ताची म्हायती घेतल्या. फुडल्या म्हयन्यांत ह्या शाळांक हीं उपकरणां दितले, अशें संबंदितांनी सांगलां. शाळेंतले शिक्षकूच व्हिडीयो दाखोवन विद्यार्थ्यांक हें शिक्षण दितात. यत्ता 5 वेच्या विद्यार्थ्यांक ह्या अभ्यासक्रमाची वळख जावची हे खातीर कंप्युटराच्या वर्गाक कांय खेळ खेळपाक दितात. तेच वांगडा ह्या विशयाची आवड आशिल्ल्या दरेके शाळेंतले 8 टक्के विद्यार्थ्यांक लागींचे मुखेल शाळेंत सप्तकांतले दोन दीस दोन वरां मार्गदर्शन करतले, अशेंय म्हणलां. कितेंय आसलें तरीय शाळेंतल्या दरेका विद्यार्थ्याक हो अभ्यासक्रम शिकोवपा खातीर इंटरनेट, कंप्युटर शिक्षक आनी कंप्युटर ह्यो मुळाव्यो म्हत्वाच्यो गजाली आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
