भांगरभूंय | प्रतिनिधी
येजमान भारतान तीन टी-20 मॅचींचे माळेंतले पयले मॅचींत दक्षीण आफ्रिकेक 8 विकेटींनी हारयलो. फास्ट बॉलरांच्या जबरदस्त प्रदर्शनाच्या नेटार भारतान दक्षीण आफ्रिकेचो डाव 20 ओव्हरींनी 8 बाद 106 धांवड्यांचेर आडायलो.
अर्शदीप सिंगान तीन, दीपक चहरान आनी हर्षल पटेलान दरेकी दोन विकेटी घेतल्यो. एक विकेट अक्षर पटेलाक फावो जाली.
ते उपरांत भारतान 16.4 ओव्हरींनी 2 विकेटी वगडावन 110 धांवड्यो करून जैत जोडलें. सुर्यकुमारान नाबाद 50 आनी लोकेश राहुलान 56 बॉलांनी नाबाद 51 धांवड्यो केल्यो.
ते पयलीं टॉस हारल्या उपरांत पयलीं बॅटींग करपी दक्षीण आफ्रिकेची सुरवात सामकी बाबत जाली. ताच्या डावाची सुरवात क्विंटन डी कॉक आनी तेम्बा बावुमा हांणी केली. बावुमा पयलेच ओव्हरींत दीपक चहराचे इन स्विंगाचेर बोल्ड जालो. फुडले ओव्हरींत अर्शदीप सिंगान डी कॉकाक बोल्ड केलो. अशे तरेन दक्षीण आफ्रिकेन 1 धांवडेचेर दोन विकेटी वगडायल्यो.
अर्शदीप हांगाच थांबूंक ना. ताणें दोन वायड बॉल घाल्या उपरांत रोसोक (0) बाद केलो. विकेटकीपर ऋषभ पंतान ताची कॅच धरली. अखेरच्या बॉलाचेर अर्शदीपान मिलराक बोल्ड केलो. अशे तरेन पयले ओव्हरींत ताणें तीन विकेटी घेतल्यो.
आफ्रिकेचे बॅट्समन बॉलांक समजून घेवपाक संघर्श करतना दिसले. दीपकान आपले दुसरे ओव्हरीच्या तिसऱ्या बॉलाचेर ट्रिस्टनाक बाद केलो. मार्करमान एक बाजू सांबाळून धरली आनी पर्नेला वांगडा मेळून डाव मुखार व्हेलो. पूण, मार्करम आठवे ओव्हरींत 25 धांवड्यो करून बाद जालो. हर्षल पटेलान ताका बाद केलो.
मर्कराम बाद जाल्या उपरांत पर्नेलान डाव मुखार व्हरपाचो यत्न केलो. पूण, तो 16वे ओव्हरींत अक्षर पटेलाचो शिकार थारलो. आफ्रिके केशव महाराजान शंबरा भितर बाद जावपा पसून वाटायलो. ताणें 35 बॉलांनी पांच चवके आनी दोन सक्यांचे मजतीन 41 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
