भांगरभूंय | प्रतिनिधी
फोंडें: संवसारांत दर दिसा विज्ञानीक मळाचेर उदरगत जायत आसता, पूण अजून मेरेन रगताची निर्मिती करपाक शास्त्रज्ञांक येस मेळूंक ना. गरजे वेळार दुयेंतींक तशेंच अपघातांत सांपडिल्ल्यांक ताकतिकेन रगताची पुरवण करचे खातीर रक्तदान म्हत्वाचें जालां. हेच खातीर रक्तदान हें सगळ्यांत व्हड दान अशें मानतात. फोंडेंच्या सुदेश रमाकांत नार्वेकार ह्या 51 वर्सां पिरायेच्या मनशान फाटल्या 33 वर्सांत 100 खेपे रक्तदान करून एक आगळो वेगळो विक्रम रचला.
सार्थक फावंडेशनचे संयोजक आशिल्ले सुदेश नार्वेकार हांणी फाटल्या आयतारा 100 वें रक्तदान केलें. सार्थक फावंडेशनान गोंयांत 130 रक्तदान शिबिरां आयोजीत करून गरजेवंत दुयेंतींक जीवदान दिवपाचे यत्न केला.
सार्थक फावंडेशनचे संयोजक आशिल्ले सुदेश नार्वेकार हांणी पिरायेच्या 18व्या वर्सां सावन रक्तदान करपाक सुरवात केली. हालींच 100वें रक्तदान करून तांणी फोंडें म्हालांत तशेंच पुराय गोंयांत एक नवो विक्रम रचला. तेचवांगडा फावंडेशनाचे आनीक एक वांगडी विनोद चिमुलकार हांणी लेगीत 64 खेपे रक्तदान केलां. फावंडेशना वतीन दर दिसा कितल्याशाच दुयेंतींक रगत दिवपाचें काम पदाधिकारी करतात. फावंडेशनांत सुमार 30 कार्यकर्ते गरजेवंत दुयेंतींक रगत दिवपाचो वावर करतात.
सार्थक फावंडेशना वतीन आतां मेरेन उण्यांत उणे 6 हजार दुयेंतींक रगत दिवपाचो मोलादीक वावर केला. गोवा मॅडिकल कॉलेज, हॉस्पिसियो, मणिपाल आनी व्हिक्टर हांच्या माध्यमांतल्यान आतां मेरेन दोळे तपासणी, रक्तदान तशेंच भलायकी शिबिरांचें आयोजन केलां. ह्या वावराक फाटल्या 8 वर्सां सावन डॉ. राजेंद्र देव, डॉ. रघुनंदन तशेंच डॉ. केतन भाटीकार हांचो फावंडेशनाक व्हड आदार मेळ्ळा.
फुडारांत लेगीत रक्तदान करतलों: नार्वेकार
रक्तदानाक लागून कितल्याशाच दुयेंतींक जीवदान मेळटा. फाटल्या कांय वर्सां सावन केल्ल्या रक्तदानाक लागून व्हड समाधान मेळटा. कसलीच अपेक्षा बाळगिनासतना रक्तदान करता आनी फुडारांत लेगीत रक्तदान करपाची इत्सा आसा. लोकांनी रक्तदाना खातीर मुखार सरचें. रस्तदानाक लागून गरजू दुयेंतींक रगताची पुरवण जावपाक शकता. एकाद्याचो जीव वाटावपा खातीर केल्लें रक्तदान भोवमोलादीक आसता, अशें सुदेश नार्वेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
