भांगरभूंय | प्रतिनिधी
30 सप्टेंबराक आनी 1 ऑक्टोबराक कार्यावळी
मडगांव: कोंकणी भाशा मंडळ 30 सप्टेंबराक आपलें 60 वें वर्स मनयता. हिरक महोत्सवा निमतान, मंडळान दोन दिसांच्यो कार्यावळी आयोजीत केल्यात. 30 सप्टेंबराक मडगांवच्या रवींद्र भवनांत जावपी वर्धापनदीस कार्यावळींत, गोंय आनी कोंकणी खातीर निसुवार्थीपणान कार्य केल्ल्या स म्हालगड्यांचो भोवमान जातलो अशी म्हायती कोंकणी भाशा मंडळाची अध्यक्ष अन्वेषा सिंगबाळ हांणी पत्रकार परिशदेंत उलयतना दिली.
ह्या वेळार उपाध्यक्ष पोब्र फर्नांडीस आनी सचीव उल्हास गांवकार हाजीर आसले.
नागेश करमली, ॲड. उदय भेंब्रे, दामोदर मावजो, पुंडलीक नायक, मीना काकोडकार, हेमा नायक हांचो जिवन गौरव पुरस्कार भेटोवन भोवमान जातलो. हे कार्यावळीक मुख्यमंत्री डॉ प्रमोद सावंत मुखेल सोयरे म्हूण हाजीर रावतले, जाल्यार मानाचे सोयरे म्हूण मुंबयच्या द टाटा इन्स्टिट्यूट ऑफ सोशल सायन्सीसच्या स्कूल ऑफ डेव्हलपमेंट स्टडीजचे डीन आनी लेखक प्रो. डॉ अश्वीन कुमार हाजीर रावतले. तशेंच गोंय आनी कोंकणी खातीर निसुवार्थीपणान कार्य केल्ले खातीर लोर्ना कोर्देयरो, पं. अजीतकुमार कडकडे, राजेंद्र आर्लेंकार, अवधूत तिंबलो, दत्तराज साळगांवकार, श्रीनिवास धेंपो, डॉ. प्रमोद साळगांवकार आनी कमलाक्ष नायक हांकां मंडळाचे मानद वांगडीपद भेटयतले. हिरक महोत्सवा निमतान कोंकणी ह्या विशेश अंकाचेंय मानेस्तांचें हस्तुकीं प्रकाशन जातलें.
1 ऑक्टोबराक मडगांवच्या गोमंत विद्या निकेतनांत वर्सुकी पुरस्कार भेटवण सुवाळो जातलो. ह्या सुवाळ्याक मुखेल सोयरे म्हूण भारतीय साहित्यीक अरुण कमल हाजीर रावतले. मानाचे सोयरे म्हूण जेश्ठ साहित्यीक मीना काकोडकर, कोंकणी म्हालगडे नारायण मावजो, गोंय शालांत मंडळाचे आदले अध्यक्ष जुझे रिबेलो. जेश्ठ कोंकणी कार्यकर्ते आर. बी. एस. कोमरपंत आनी संचालक प्रशिक्षण आनी सचीव जीपार्ड सोसायटीचे मायकल डिसोझा (आयएएस) हे मानेस्त हाजीर रावतले.
मंडळाच्या हिरक महोत्सवी कार्यावळीक कोंकणी मोग्यांनी व्हड संख्येन हाजीर रावचें अशें आवाहन मंडळाची अध्यक्ष अन्वेषा सिंगबाळ हाणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
