भांगरभूंय | प्रतिनिधी
भांगरभूंय । प्रतिनिधी
वास्कोः चवथ जावंन 25 दीस जाले तरी चिखली हांगचे खाडयेंत विसर्जऩ केल्ल्यो प्लास्टर ऑफ पॅरीसच्या (पीओपी) गणेश मूर्ती उदकांत विरगळल्यो ना. अशी सुमार 50 गणेश मूर्तीचे अवशेश एकठांय करून ते अरबी दर्यांत विसर्जित करपाचें काम चिखली पंचायतीची पंच वांगडी सुषमा नायक हिणे केलें.
खाडयेंत गणपती मूर्ती विरगळनास्तना आसात हें पळयतगीर सुषमा नायक हिणे मानायां करवी त्यो उदकांतल्यान भायर काडल्यो. राज्यांत पीओपीच्यो गणपती मूर्ती विकपाक सरकारान बंदी घातल्या तरी तो सर्रासपणान विकतात हाची गवाय ह्यो मूर्ती दिताल्यो. लोक सवाय मेळटात म्हणून पीओपीच्यो मूर्ती घेतात. चवथी उपरांत विसर्जनाचे सुवातेर तांची दुर्दशा जाल्ली दिश्टी पडटा. ते पळोवपाक जालें ना देखून तो खाडयेंतल्यान काडून दर्यांत तांचे वि,सर्जन करपाचें काम म्हाका करचें पडलें अशें नायक हिणे पत्रकारांक सांगलें.
कांय लोक चवथीक मखर, लायटींग, जेवण, भजन आनी सावंड सिस्टम लावपा खातीर आमी हजारांनी रुपया खर्च करतात. मात चिकणमातयेच्या मूर्तींक मात्शे चड पयशे पडटात म्हणून पीओपीच्यो मूर्ती हाडटात. पीओपी उदकांत सहजतायेन विरगळना तशेंच ताका लागून उदक प्रदूशीत जाता. चवथी उपरांत विसर्जनाच्या सुवातांनी वचून विरगळपाक शकनाशिल्ल्या मूर्ती अवशेशांचे दर्यात विसर्जन करपाची वेवस्था करपाची सूचोवणी आपूण मुरगांव हिंदू समाजाक करतले अशें नायक हिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
