भांगरभूंय | प्रतिनिधी
भांगरभूंय । प्रतिनिधी
वाळपयः गोंय- बेळगांव मार्गा वयल्या चोर्ला घाटांत अवजड वाहनााक येरादारी करपाक जिल्होधिकाऱ्यांनी घातिल्ले बंदी आदेशाची अंमलबजावणेक सोमाराच्या सुरवात जाली. येरादारी खात्याच्या अधिकाऱ्यांनी घेतिल्ले कडक भूमिकेक लागून गोंय हद्दींत केरी तपासणी नाक्यार रस्ताच्या दोनूट वटेन अवजड वाहनांची व्हडली रांग लागल्या. कांय वाहनां रस्त्या कुशीक पार्क करून दवोरल्यांत. हेर वाहनांक तांची आडखळ जावपाक लागिल्ल्यान तणावाची स्थिती उप्रासपाची भिरांत आसा.
अवजड वाहनांक वचपाक दिलें ना जाल्यार बेळगांवांतल्यान येवपी भाजी आनी दुदाची वाहनां आडोवपाची शिटकावणी अवजड वाहनांचे ड्रायव्हर आनी धनयांनी दिल्या. आठ दिसां पयलीं चोर्ला घाटांतल्यान अवजड वाहनां व्हरपाक जिल्होधिकाऱ्यान बंदी घातिल्ली. मात ताची अंमलबजावणी जायनाशिल्ली. केरी पंचायत मंडळान येरादारी खात्याच्या अधिकाऱ्यांची भेट घेवन विचारपूस केल्या उपरांत सोमारच्यान तांणी अवजड वाहनां आडावपाक सुरवात केली. सांजे मेरेन केरी तपासणी नाक्या कडेन शंबरां परस चड अवजड वाहनां आडायल्लीं. बंदोबस्ताक पुलीस नाशिल्ल्यान ह्या वाहनांक लागून तणाव तयार जावपाची परिस्थिती उप्रासल्ली.
अवजड वाहन ड्रायव्हर येरादरी अधिकाऱ्यां कडेन वाद घालतना दिसताले. जो मेरेन जिल्होधिकारी वा खात्याचे वरिश्ठ अधिकारी परवानगी दिनात तो मेरेन वाहना सोडप शक्य जावचें ना अशें केरी हांगा येरादारी अधिकाऱ्यांनी सांगलें. जिल्होधिकाऱ्याच्या आदेशाची खरपणान अंमलबजावणी करचे पयलीं दंड घालून अवजड वाहनां सोडटाले. सध्या आडावन धरिल्ली वाहना सोडना जाल्यार गोंयांत येवपी भाजी आनी दुदाची वाहनां तशेंच सादी प्रवासी वाहनां अडकून पडपाची शक्यताय आसा.असंतोषाचो स्फोट जावपाची भिरांत
अनमोड घाटांतल्यान वचपाक अवजड वाहनांक बंदी आसा. आतां चोर्ला घाट रस्तो बंद केल्ल्यान ताकां आंबोली मार्गान बेळगांवाक वच्चे पडटलें. ताका 160 किलोमीटर लागता. गोंयांतल्यान बेळगांव वचपाचे चोर्ला आनी अनमोड घाट रस्ते बंद केल्ल्यान चड इंधन खर्च करून आंबोलीच्यान वचप अवजड वाहनांत परवडना. चोर्ला घाट रस्तो बंद केल्ल्यान तांचे मदीं सध्या असंतोष पातळ्ळा. परिस्थितींत फरक पडना जाल्यार ताचो स्फोट जावपाची भिरांत आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
