भांगरभूंय | प्रतिनिधी
दुबावीत बांगलादेशी घुसखोर आशिल्ल्याचो दुबाव; सतर्क रावपाचो पुलिशेचो उलो
भांगरभूंय । प्रतिनिधी
वाळपयः नगरगांव वाळपयच्या सरकारी माध्यमीक विद्यालयाच्या कांय विद्यार्थीनींचें दुबावीत तरेन फोटो घेतना कांय बिगर गोंयकारांक थळाव्या लोकांनी बडोवपाचो प्रकार शुक्रारा घडलो. फोटो काडपी अनवळखी लोक कोण, असो प्रस्न थळाव्या लोकांनी उपस्थीत केला. कोणाचेंच अपहरण जावंक ना. हे संबंदांतली चुकीची म्हायती समाज माध्यमांतल्यान भोंवता. ताचेर कोणेच विस्वास दवरचो न्हय, असो उलो नगरगांव विद्यालया वतीन मारला.
मेळिल्ले म्हायती प्रमाण शुकारा दनपारा तीन बिगर गोंयकार विद्यालया कडेन चलयांचे दुबावीत तरेन फोटो घेताले. ताका लागून भुरग्यां मदीं भिरांत पातळ्ळी आनी तांणी ही खबर नगरगांव माध्यमीक विद्यालयाच्या शिक्षकांक आनी पालकांक दिली. हे विद्यालय मुखेल रस्त्याचे कुशिकूच आशिल्ल्यान थंय सदांच लोकांचें यो- वच चालू आसता. पालकांक कोण तरी लिपचोरयां भुरग्यांचे फोटो काडटा, अशी म्हायती पालकांक मेळटाच ते थंय आयले आनी तांणी तांचे कडेन हे संबंदांत चवकशी केली. त्या वेळार ते तिगूय थंयच्यान धांवपाक लागले. ह्या वेळार थळाव्या लोकांनी तातूंतल्या एकल्याक धरलो आनी बरोच बडयलो. दोन जाण थंयच्यान पळून वचपाक येसस्वी जाले. चलिल्ल्या प्रकारा विशीं थळाव्या लोकांनी धरिल्ल्या मनशाक जाप विचारली. त्या वेळार तो उलयतालो ती भास लोकांक कळपाक शकली ना. ताका लागून तो खंयच्या वाठारांतलो तें कळपाक शकलें ना. मात हे घडणुकेक लागून पालकां मदीं भंय निर्माण जाला. ह्या विद्यालयाक सरकारान सुरक्षा रक्षक दिवचो, अशी मागणी पालक आनी शिक्षकांनी केल्या. मदले सुटयेंत वा मेकळ्या वर्गा वेळ्यार विद्यार्थी वर्गा भायर येतात. त्या वेळार तांच्या जिवाक भंय उप्रासूं येता. ताका लागून सरकारान विद्यार्थ्यांचे सुरक्षे कडेन गंभीरपणान लक्ष दिवचें, अशी पालकांनी मागणी केल्या.
अपहरणाची समाज माध्यमांचेर वावडी
नगरगांव विद्यालया कडेन लिपचोरयां फोटो काडप्याक बडयिल्ल्याची खबर वाऱ्या भशेन सगळे कडेन पावली. कांय समाज माध्यमांचेर नगरगांव माध्यमीक विद्यालयाच्या चलयांचें अपहरण करपाचो यत्न जालो, अशी चुकीची खबर पातळायली. हे संबंदांत विद्यालया कडल्यान एक संदेश जारी केला. तातूंत म्हणलां, विद्यालयांतले खंयचेच चलयचेचें अपहरण करपाचो यत्न जावंक ना. हे संबंदांत चुकीची म्हायती पातळ्ळ्या, लोकांनी ते खबरेचेर विस्वास दवरचो न्हय, अशीय विद्यालयान विनवणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
