भांगरभूंय | प्रतिनिधी
भुरग्यां मदीं भंय; सरभोवतणचीं झाडां मारपाची पालक, शिक्षकांची मागणी
भांगरभूंय । प्रतिनिधी
वाळपयः वाळपय शारांतल्या फातिमा कॉन्व्हेंट मुळाव्या आनी पूर्व मुळावे शाळे लागसार वानरांनी धुमशेण कांडलां. ताका लागून भुरग्यांच्या जिवाक भंय उप्रासला. हे शाळे भोंवतणी आशिल्लीं झाडां ताकतिकेन मारचीं, अशी मागणी पालक आनी शिक्षकांनी केल्या.
हे संबंदांत पालक- शिक्षकांनी वाळपय पालिकेक निवेदन दिलां. ह्या निवेदनाची गंभीर दखल घेवची, अशी तांणी मागणी केल्या. तीं झाडां मारलीं जाल्यार वानरांच्या धुमशेणांचेर नियंत्रण येतलें, अशें त्या निवेदनांत म्हणलां.
मेळिल्ले म्हायती प्रमाण वाळपय शारांत फातिमा कॉन्व्हेंट ही पूर्व मुळावी आनी मुळावी शाळा आसा. शाळे भोंवतणी खूब झाडां आसात. ताचेर व्हड प्रमाणांत वानर बसतात. ते शाळेंत व्हड संख्येन ल्हान भुरगीं शिकतात. तीं शौचालयांत वतात तेन्ना ते वानर तांच्या आंगार धांवून वतात. फाटल्या आठ दिसां सावन ह्या प्रकरणांनी खूब वाड जाल्या. ताका लागून भुरग्यां मदीं भंय पातळ्ळा.
हुस्क्यांत सांपडिल्ल्या पालकांची हालींच एक म्हत्वाची बसका जाली. हे बसकेंत त्या वानरांचेर नियंत्रण मेळोवपा खातीर चर्चा केली तशेंच शाळे भोंवतणचीं झाडां मारचीं, ह्या निर्णयाचेर पावले. तशा आशयाचें एक निवेदन तांणी वाळपय पालिकेक भेटयलें.
वानरांक लागून भुरगीं शाळेंत वचपाक तयार जावचीं नात. ताका लागून ताचें शिक्षणीक लुकसाण जातलें, असो हुस्को कांय पालकांनी उक्तायलो.
वानर म्हणल्यार एक त्रासूच जाला. तांचेर नियंत्रण मेळोवचे खातीर शाळे कुशीचीं रानवटी झाडां मारची, अशी खूब खेपे मागणी केल्या. पूण सरकारी यंत्रणा ते कडेन सामकीच आडनदर करता, अशें कांय शिक्षकांनी प्रतिनिधी कडेन उलयतना सांगलें. नगराध्यक्ष सेहझीन शेख हांणी तीं झाडां मारतले, अशें आस्वासन दिलां. मात ते आस्वासन बेगिनात बेगीन पुराय करचें, अशें पालक आनी शिक्षकांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
