भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळ नगराध्यक्ष आनी उपनगराध्यक्ष फेरबदला संबंदी फुडल्या 10 दिसांत निर्णय घेतले. मुख्यमंत्री आनी प्रदेश भाजपा अध्यक्षा कडेन उलोवणी केल्या उपरांत हो बदल करतले अशें म्हापश्याचो आमदार आनी उपसभापती जोशुआ डिसोझा हांणी सांगलें.
म्हापशें हनुमान नाट्यघरांत आयोजीत केल्ल्या पंतप्रधान नरेंद्र मोदी हांचे जिणेचेर आदारीत प्रदर्शनाक शुक्राराक भेट दिल्ली तेन्ना ते पत्रकारां कडेन उलयताले. नगराध्यक्ष आनी उपनगराध्यक्ष कोणाक करप हें अजून थारलें ना. पालिका मंडळांत सत्ताधारी पंगडांतल्या सगल्यांक विस्वासांत घेवन तें थारायतले अशें डिसोझा हांणी स्पश्ट केलें. नगराध्यक्ष आनी उपनगराध्यक्षाचो थारावन दिल्लो कार्यकाळ सोपला. विधानसभा आनी पंचायत वेंचणुको आनी चवथीक लागून हो फेरबदल करपाचें उरलें.
आमच्या पॅनलांत ज्येश्ठ कार्यकर्ते आसात. हाचे फुडें नगराध्यक्ष आनी उपनगराध्यक्षाचो कार्यकाळ एक वर्सांचोच आसतलो अशें डिसोझान सांगलें. मजगतीं मायकल लोबो परत भाजपांत आयले हातूंत अजाप अशें कांयच ना. ते पयलीं भाजपांत आनी मंत्री आशिल्ले. कांय कारणांक लागून तांणी पक्ष सोडलो. आता तांकां तांची चूक दिसल्या आनी तांणी ते परत पक्षांत आयले अशें डिसोझान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
