भांगरभूंय | प्रतिनिधी
सीबीआयक म्हापशें न्यायालया कडल्यान 20 दिसांची परवानगी
भांगरभूंय । प्रतिनिधी
म्हापशें: भाजपा फुडारी सोनाली फोगट हांच्या खून प्रकरणांतले दुबावीत सुधीर सांघवा आनी सुखविंदर सिंग हांची कोलवाळ बंदखणींतूच चवकशी करपाक म्हापशें न्यायालयान 20 दिसांची परवानगी दिल्या. तशेंच दुबावितांक अतिरिक्त 14 दिसांची न्यायालयीन कोठडेंत दवरपाचो आदेश दिला.
सीबीआयन शुक्रारा 23 सप्टेंबराक म्हापशें प्रथमवर्ग न्यायालयांत दुबावितांक हाजीर केले. त्या वेळार न्यायालयान दुबावितांक 14 दिसांची अतिरिक्त न्यायालयीन कोठडी फर्मायली. फाटल्या 10 सप्टेंबर सावन दुबावीत न्यायालयीन कोठडेंत आसात.
बुधवारा 21 सप्टेंबराक सीबीआयन म्हापशें न्यायालयाक दुबावीत सुधीर आनी सुखविंदर हांची चवकशी करपाक परवानगी दिवपाची विनवणी करपी अर्ज दाखल केल्लो. ते प्रमाण न्यायालयान सीबीआयक दुबावितांची कोलवाळ बंदखणींतूच न्यायालयीन कोठडेंत चवकशे खातीर 20 दिसांची परवानगी दिल्या. सकाळीं 9 ते सांजेच्या 6 वरां मेरेन चवकशी करपाक न्यायालयान मंजुरी दिल्या. ते प्रमाण सीबीआय अधिकारी वयल्या वेळांत दोनूय दुबावितांची चवकशी करतात.
सुनावणे वेळार सुधीर सांघवा हांचे वकील अॅड. अमीत जगलान आनी अॅड. अभिनव सिंग जाल्यार सरकारी वकील अॅड. तेजस पवार हाजीर आशिल्ले. तशेंच दोनूय दुबावीत हाजीर आशिल्ले. मजगतीं, फोगट हांकां 23 ऑगस्टाक वागातोरा मरण आयिल्लें. हणजूणें पुलिसांनी ह्या खून प्रकरणांत सुधीर सांघवा आनी सुखविंदर सिंग हांकां तशेंच ह्याच प्रकरणा कडेन संबंदीत घुंवळे वखदां प्रकरणांत एडवीन नूनीस, दत्तप्रसाद गांवकार आनी रामदास मांद्रेंकार ह्या पांच जाणांक अटक केल्ली. ते उपरांत गोंय सरकारान हें प्रकरण फुडले चवकशे खातीर सीबीआय कडेन दिलां.
बचाव पक्षाक आगाऊ नोटीस दिवचीः अॅड. जगनाल
न्यायालयान सीबीआयक बिरेस्तार 22 सप्टेंबर सावन 12 ऑक्टोबर मेरेन दुबावितांची चवकशी करपाक परवानगी दिल्या. पूण हाची आमकां कल्पना नाशिल्ल्यान सुनावणे वेळार आमकां हरकत घेवपाक मेळूंक ना. हे फुडें सीबीआयन कसलोय अर्ज दाखल करचे खातीर बचाव पक्षाक आगाऊ नोटीस मेळची, अशी म्हापशें न्यायालयाक आमी विनवणी केल्या, अशें अॅड. अमीत जगलान हांणी पत्रकारां कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
