भांगरभूंय | प्रतिनिधी
द स्पिरीट आॅफ गोवा महोत्सव उमेदीन सुरू
भांगरभूंय I प्रतिनिधी
पणजी : गोंयकारां मदीं सुसंवाद आसा. एकोप्यान रावप ही हांगाची संस्कृती आनी ती गोंयकारांनी सदांच पाळ्ळ्या. पर्यटन आनी म्हायती तंत्रज्ञान एकमेकांक पोशक आसा. तांचे विशींची एकात्मीक येवजण रोखडीच तयार करतले. तातूंत साबार कार्यावळींचें एक कॅलेंडर आसतलें, अशें पर्यटन मंत्री रोहन खंवटे हांणी सांगलें. द स्पिरीट आॅफ गोवा महोत्सवाच्या उक्तावणा वेळार ते उलयताले. आयज हे कार्यावळीचो निमणो दीस आसा. ह्या वेळार जीटीडीसीचे चॅरमन, आमदार गणेश गांवकार, पर्यटन सचिव रवी धवन, पर्यटन संचालक मिनिनो डिसोझा, जीटीडीसी वेवस्थापकी संचालक निखील देसाय हजर आशिल्ले.
उक्तावणा वेळार तांणी सगल्या स्टाॅलांची पळोवणी केली. तशेंच तांच्या धनयां कडेन भासाभास केली. ह्या महोत्सवांत गोंयचें खाण, पेयां आसात. कुणबी साडी, पाटले करप हाचीं प्रात्यक्षिकां आसात. गोंयचीं फळां, भाजयांचें प्रदर्शन मांडलां. काजू पेयां तयार करपी, टाॅडी टेपर, नाल्लाचो वापर करून आगळे खेळ ह्या थळाचेर आशिल्ले. गोंयची कोगुळ लाॅर्ना, तशेंच हेर कलाकारांची संगीत, गायनाची कार्यावळ जाली. त्यावेळार रसिकांनी गर्दी केल्ली.
कोरोनाक लागून लोकांक फुकट मास्क वांटले. गोंयची जीण, खाणां, कलाप्रकार साबाळप, तांचो प्रसार करप हो ह्या महोत्सवाचो उद्देश. नाल्ल आनी काजू पसून फेणी करपाची कला लोकांक पळोवपाक मेळ्ळी. हे गोंयचे जीणेच भागूच जाल्यात. गोंयचे फेणयेक 2009 क जीआय स्टेटस मेळ्ळा. हे खातीर गोवा काजू फेणी डिस्टिलर्स आनी बोटलर्स असोसिएशन, विज्ञान- तंत्रज्ञान, पर्यावरण खातें आनी गोंय सरकारान यत्न केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
