भांगरभूंय | प्रतिनिधी
फुडल्या म्हयन्यांत 16 ते 31 ऑक्टोबर मेरेन ऑस्ट्रेलियांत टी- 20 क्रिकेट विश्व करंड सर्त जातली. बीसीसीआयन हालींच हे सर्ती खातीर 15 वांगड्यांच्या भारतीय पंगडाची घोशणा केल्या. तातूंत रोहित शर्मा आनी के एल राहुल हे कॅप्टन आनी उप कॅप्टन भारता खातीर डाव सुरू करतले. मिडल ऑर्डरीची जापसालदारकी विराट कोहली, सूर्यकुमार यादव, दीपक हुड्डा आनी विकेटकीपर ऋषभ पंत हांकां दिल्या. जाल्यार दिनेश कार्तिकाक अतिरिक्त विकेटकिपर म्हूण संद दिल्या, ती ताच्या फिनिशर म्हणून केल्ले कामगिरीक लागून.
भारताची बॅटिंग घट आसा आनी पयले तीन बॅट्समॅन रोहित, राहुल, विराट हे संवसारांतले सगल्यात बरे बॅट्समॅन अशें सगलेच खेळामोगी मानतात. मजेची गजाल म्हळ्यार तिगूय फॉर्मांत आसात. आशिया कपांत तांणी बरी कामगिरी केल्या. विराटान एक शेंकडो मारून प्रतिस्पर्धी बाॅलरांक शिटकावणी दिल्या. तो परतून फॉर्मांत आयिल्ल्यान भारताची विश्व करंड जिखपाची आस्त वाडल्या.
मिस्टर 360 सूर्यकुमार यादव चवथ्या क्रमांकाचेर खेळटलो. तो मैदानाचेर खंयूय चवके, सके मारपाक शकता. तो भारताचो खात्रेचो बॅट्समॅन. ते उपरांत विकेटकीपर बॅट्समॅन म्हूण ऋषभ पंत वा दिनेश कार्तिक येतले. दोगूय सामके स्फोटक बॅट्समन आनी मॅच फिनिशर. उण्या बॉलांनी चड धांवड्यो करून पंगड जिखपाक मजत करपांत दोगांयचोय हात आसा. उपरांत येता सध्या संवसारांतलो सगळ्यांत बरो ऑलराउंडर हार्दिक पांड्या. आपली बाॅलिंग, धडाकेबाज बॅटिंग आनी प्रभावी फिल्डिंग करून पंगडाच्या जैतांत ताणें म्हत्वाचो वांटो उखल्ला. ताणें आपल्या ऑलराउंड खेळांतल्यान भारतांत जायतीं जैत मेळोवन दिल्यात. दीपक हुडा हो आनीक एक ऑलराउंडर. स्लो बाॅलिंग आनी स्फोटक बॅटींग हीं ताचीं खाशेलपणां.
बाॅलिंगेत निवड समितीन तीन स्पिनरांक संद दिल्या. तातूंत अणभव आशिल्लो रविचंद्रन आश्विन, टी- 20 स्पेशलिस्ट लेग स्पिनर यजुवेंद्र चहल आनी लेफ्ट आर्म स्पिनर अक्षर पटेल हांकां संद मेळ्ळ्या. रवींद्र जडेजा जखमी जाल्ल्यान अक्षर पटेलाक चान्स पडला. निवड समितीन ऑफ स्पिनर, लेग स्पिनर आनी लेफ्ट आर्म स्पिनराक संद दिवन बाॅलिगेंत विवीधताय हाडपाचो यत्न केला. आश्विन आनी अक्षर पटेल लेगीत गरज पडल्यार बॅटींग करतात. तांची बॅटींग भारता खातीर बोनस थारतली. अणभव आशिल्ले फास्ट बाॅलर जसप्रीत बुमराह आनी भुवनेश्वर कुमार हांचे वांगडा तरणाटे बाॅलर हर्षल पटेल आनी आर्षदीप सिंग हांकांय घेतल्यात. निवड समितीन मुहंमद शामी ह्या अणभवी बाॅलरा कडेन मात आडनदर केली, हाचें वायट दिसता. कारण विश्व करंडा सारकिल्ले व्हडले आनी म्हत्वाचे सर्तींत ताच्या अणभवाचो भारतीय पंगडाक खूब फायदो जावपाचो.
निवड समितीन एक बरो पंगड वेंचून काडला, अशें म्हणचे पडटलें. पोरण्या आनी नव्या खेळगड्यांक संद दिवन जोश आनी होश हांचे मदीं संतुळा दवरपाचो यत्न समितीन केला. तातूंत ते कांयशे यशस्वीय जाल्यात. विश्व करंड सर्ती खातीर वेंचून काडिल्लो हो पंगड संतुलीत आसा हे मान्य करून निवड समितीक परबीं दिवचींच पडटलीं.
आतां जापसालदारकी ह्या वेंचून काडिल्ल्या 15 खेळगड्यांचेर. आशिया कपांतल्या अपेसाक भायर मारून नव्यान सुरवात करपाची संद पंगडाक मेळटली. सगळे खेळगडे अणभवी आसात. सगळे टी- 20 त फिशाल आसात, देखून ते पंगडा खातीर आपले गुण पणाक लायतले आनी 15 वर्सां उपरांत भारताक टी- 20 विश्व करंड जिखोवन दिवपाची जापसालदारकी येसस्वीपणान पाळटले, अशी आस्त बाळगूया. टी- 20 क्रिकेट विश्व करंडा खातीर भारतीय पंगडाक परबीं.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
