भांगरभूंय | प्रतिनिधी
सत्कार हो मनाक आनंद, खोशी दिणारो एक मोलादीक खीण. आपुण केल्या बऱ्या कार्याची ती एक पावती अशें म्हणू येता. त्या वेळार सत्कार मुर्तीक सुद्धां आपुण केल्ल्या कश्टाची, दुख्खाची आनी मेहनतीची जाणीव जाता. आपुण समाजा खातीर, गरिबां खातीर केल्ले मदती खातीर आपलो आज सत्कार जाता, हांचें ताका समाधान आसता.
दुसऱ्याच्या घरा आयदनां घासून आपल्या कुटूंबाचें पालन, पोशण करपी मातेचो सत्कार, सोरो पियोवन मार घालपी घोवाचो त्रास सोंसपी बायलेचो सत्कार हो खऱ्या अर्थान सत्कार. आपल्या खर कश्टाचें फळ म्हणल्यार सत्कार. आपुण लग्न जाले बरोबर एका म्हयन्यांत घोवाची नोकरी वचप, मागीर घरच्या घरा पापड, लोणचीं करुन दारादारांत विकपी बायलेचो सत्कार केलो तर ती खरेंच बरी गजाल. स्वताक नवी व्हंकल समजनासतना रातीचे दीस करुन राब राब राबपी महिलेक म्हजे कोटी कोटी सलाम. खंबीरपणान गरिबी आड संघर्श करीत ‘लाथ मारीन थंय पाणी काढीन’ अशी मनात जिद्द बाळगुन आपल्या भुरग्यांक गरीब परीस्थितींत उच्च शिक्षण दिवप, बरी नोकरी मेळोवपा खातीर झटपी बायलेक यशोदामिनी, कुलस्वामीनी अश्यो पदव्यो मेळ्ळ्यात.
दोन वेळाचें भरपेट जेवण, भरजरी कपडे, ऐशोरामाची जिंदगी आशिल्ले बायलेचो सत्कार करप ही लजेची गजाल, अशें हांव म्हणटा. हो समाजान कश्टकरी बायलांचेर केल्लो अन्याय जावन आसा. समाजवावुरपी, फुडारी अश्या बायलांचो भोवमान करात, पूण गरिबी, बिकट परिस्थिती कडेन झगडून वयर सरिल्ले बायलेचीय तुस्त, तोखणाय करात. म्हाका सांगीन दिसता, उठसूठ कोणाचोय सत्कार करुंक फुडें सरुं नाकात. खिणभर विचार करात.
कठीण परिस्थितींत भियेनासतना संकश्टाचेर मात करपी, खंबीर, धाडसी, हांसत मुखान संकश्ट, परिस्थिती कडेन चार हात करपी येसस्वी महिलेचो सत्कार हो समाजाक देख दिवपी. आपलो सत्कार जाता हे कळतकुच खऱ्या अर्थान तिच्या आंगांत शक्तीचें वारें संचारता, हातूंत दुबाव ना. तिचो आनंद म्हणजे गरिबांचो आनंद.
सिद्धी तिळवे
7972535321
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
