भांगरभूंय | प्रतिनिधी
विनोद पालयेंकारः प्रधानमंत्र्यांक लेगीत पत्र
भांगरभूंय । प्रतिनिधी
म्हापशें: गोंयच्या दर्यादेग वाठारांत घुंवळे वखदांचो (ड्रग्ज) उक्तेपणी वेव्हार चलता. ताचेर नियंत्रण जाय. आपूण आमदार आसतना हाचे आड आवाज काडलो. प्रधानमंत्र्यांक पत्र धाडून हो विशय मांडलो. ड्रग्ज वेव्हार आळाबंदा हाडपा खातीर आपणे प्रामाणीक यत्न केल्ले, असो दावो आदले मंत्री विनोद पालयेंकार हांणी केला.
दर्यादेग वाठारांत चलिल्ल्या ड्रग्ज वेव्हाराची म्हायती पुलिसांक आसता, पूण ते आडनदर करतात. सध्या मुख्यमंत्री डॉ. प्रमोद सावंत हांणी ड्रग्ज विरोधी कारवायेची मोहीम हातांत घेतल्या. तांचे ह्या वावराक येवकार. ड्रग्ज वेव्हार मुळा सकट ना करपा खातीर मुख्यमंत्री आनी पुलीस खात्यान उखलिल्लें हें पावल कवतुकाचें. मुख्यमंत्र्यांचे हे खर कारवाये उपरां ड्रग्ज वेव्हाराचेर कांय प्रमाणांत नियंत्रण आयलां, अशें पालयेंकार हांणी सांगलें.
कांय राजकी फुडारी ह्या ड्रग्ज वेव्हारांत घुस्पल्यात. प्रसार माध्यमांक सगळ्यो गजाली खबर आसतात. तशेंच हेराक लेगीत ताची कल्पना आसा. सध्या गांवगिऱ्या वाठारा सयत शारांत ड्रग्ज व्हड प्रमाणांत पावलां. सुजाण नागरिकांनी ड्रग्ज सासणाचो काबार करचे खातीर मुखार सरपाक जाय. ह्या ड्रग्ज वेव्हारा फाटल्यान पाब्लो एस्कोबार आसा. ताका धरपाक जाय. हेच लोक ड्रग्ज सगळ्याक पावयतात, असोय दावो पालयेंकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
