भांगरभूंय | प्रतिनिधी
आयआयटी विरोधक शेतकारांचो निर्णय
सांगें: सांग्यार आयआयटी प्रकल्प प्रकरण दिसान दीस तापत आसा. फाटले कितलेशेच दीस ह्या प्रकल्पा आड शेतकार रस्त्याचेर देंवल्यात. हक्का खातीर लडो चालूच उरतलो, अशें सांगेंच्या शेतकारांनी म्हणलां.
आयज लोकांक भेश्टावपाक कितल्याशेच पुलीस बंदोबस्ताक दवरल्यात. आमचे आड कितलीय कलमां लायलीं, आमकां अटक केली तरीय आमी भियेनात. हो प्रकल्प हद्दपार करतलेच. आपल्या फायद्या खातीर जो कोण हो प्रकल्प हाडून सांग्या वयलें वातावरण पेड्डेर करपाक सोदतात, ताका कशेच ओगी रावचे नात, अशी शिटकावणी शेतकारांनी दिल्या.
मुख्यमंत्री डॉ. प्रमोद सावंत आनी आमदार सुभाष फळदेसाय हांच्या फुडारणान सांग्यार आयआयटी प्रकल्प हाडपाचे यत्न चल्ल्यात. शेतां, भाटां, दोंगर, सैमाचें घट्टण करून तशेंच शेतकारांक उबांतराक उडोवन हो प्रकल्प कित्याक जाय? जो प्रकल्प लोकांच्या हिताचो ना, ताचेर भर कित्याक दितात? थळाव्या लोकांक ह्या प्रकल्पाचो कसलो फायदो आसा, अशें साबार प्रस्न शेतकारांनी उपस्थीत केल्यात.
चिंच वरकटो वाठारांत सर्व्हेक्षण करपाक आयिल्ल्या कर्मचाऱ्यांचो रस्तो थळाव्या लोकांनी 12 सप्टेंबराक आडायिल्लो. त्या वेळार पुलीस आनी शेतकारां मदीं धक्काबुक्की जाल्ली. तातूंत कांय बायलो जखमीय जाल्ल्यो. आपल्या हक्का खातीर झगडपी जोजफ फर्नांडीस हांकां 13 सप्टेंबराक अटक केल्ली तशेंच कांय जाणांक पुलिशेन समन्स धाडिल्ले. तांची चवकशी करचे खातीर तांकां 14 सप्टेंबराक पुलीस स्टेशनाचेर आपयिल्ले.
144 कलम लायिल्ल्यान लोकांक सभा घेवपाक तशेंच एकठांय जावपाक बंदी आसा. ते खातीर शेतांत वचपी वाटेचेर पुलीस बंदोबस्त दवरला. ताका लागून शेतकार तशेंच लोकांनी खर तिडक उक्तायल्या. कांय लोकांच्या म्हणण्या प्रमाण ह्या प्रकल्पा संबंदांत चर्चा जावप गरजेची आसा. ह्या प्रकल्पाचो लोकांक कसलो फायदो आसा, हाचेर सरकार आनी शेतकारां मदीं संवाद जावपाक जाय. गरजे भायर मेळावलींतल्यान धांवडायिल्लो प्रकल्प खंय तरी घालपाक जाय म्हूण लोकांक त्रास करून तो सांग्यार हाडप चुकीचें आसा, अशें तांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
