भांगरभूंय | प्रतिनिधी
भांगरभूंय । प्रतिनिधी
म्हापशेंः सध्याचे परिस्थितींत शिक्षकांनी विद्यार्थ्यांक अभ्यासक्रम शिकयतना भौतीक परिस्थितीची म्हायती दिवपाक जाय. तांचे मदले सुप्त गुण वळखून तांच्यांतलें कुशळताय विकसीत करून तांकां एक सुसंस्कृत नागरीर म्हणून घडोवपाचो यत्न तांणी करपाक जाय अशें गोंय माध्यमीक आनी उच्च माध्यमीक शिक्षण मंडळाचो अध्यक्ष भगिरथ शेट्ये हांणी सांगलें. दत्ताराम मंत्रवादी ममोरियल हायस्कुलाच्या स्थापणूक दीस कार्यावळींत ते उलयताले.
सर्गेस्त दत्ताराम मंत्रवादी हांचें सपन पुराय करपाचें काम तांचो चलो मंगेश मंत्रवादी बरे तरेन करता. खडू आनी फळा ही परंपरा आतां बदलपाक लागल्या. आतां कम्प्युटराचें युग आसा, अशा वेळार शिक्षकांनी विद्यार्थ्यां कडेन तेच नदरेन पळोवपाक जाय. पालकांनी आपल्या भुरग्यांचो फुडार बरो करपाचो यत्न करपाक जाय. आतांच्या जमान्यांत ज्यांचेकडेन सगल्यांत बरो डेटा आसा तो श्रेष्ठ थारतलो अशें शेट्ये हांणी फुडें सांगलें.
मंत्रवादी हायस्कुलाच्या 115व्या स्थापणूक दीस कार्यावळींक माचयेर हायस्कूल वेवस्थापन समितीचो चॅरमन मंगेश मंत्रवादी, मुख्याध्यापक शिवाजी मळीक, वेवस्थापक नरेंद्र कामत आनी प्राथमीक विद्यालयाची मुख्याध्यापिका गीता नेवगी आशिल्ली.
सुरवेक विद्यार्थ्यांनी ईशस्तवन सादर केलें. सोयऱ्याचें हस्तुकीं दीवली पेटोवन मंत्रवादी हांच्या फोट्याक फुलांहार घातलो. गुणवंत विद्यार्थ्यांक शिश्यवृत्ती भेटयल्यो. सिद्रा फारूकी ही अश्टतासी विद्यार्थिनी थारली, अरिफ खान योगपटू थारलो. शिक्षिका कार्मिना डिसोझान सूत्रसंचालन केलें, देवेंद्र साठे हांणी उपकार मानलें. नगरसेविका कमल डिसोझा आनी आदले विद्यार्थी आनी पालक कार्यावळीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
