भांगरभूंय | प्रतिनिधी
आयचे तरणाटे जर टिकावूपण, आत्मनिर्भरताय आनी उद्देजकते खातीर स्वताक वचनबद्ध करतात जाल्यार मनीस जाती मुखार आशिल्लीं व्हड आव्हानां सोडोवपाक ते मदत करूंक शकतले, अशें पी. ई. एस. कला आनी विज्ञान म्हाविद्यालयाचे प्राचार्य प्रो. विकास पिसुर्लेकार हांणी सांखळे म्हाविद्यालयाच्या विद्यार्थ्यांक मार्गदर्शन करतना सांगलें.
2022- 23 ह्या शिक्षणीक वर्सा खातीर सांखळेच्या सरकारी कला, विज्ञान आनी वाणिज्य महाविद्यालयाच्या विद्यार्थी मंडळा खातीर विद्यार्थी वेंचून आयल्यात. मंडळाच्या थापणूकेचो सुवाळो म्हाविद्यालयांत जालो. ताका प्रो. पिसुर्लेकार मुखेल सोयरे म्हूण हजर आशिल्ले. “विद्यार्थ्यांचें प्रतिनिधित्व करपी मंडळाक आपले कडेन आशिल्ल्या फुडारपणाची कुशळटाय वाडोवपाची भांगराची संद मेळ्ळ्या. हवामान बदल, मातयेचें प्रदूशण, पर्यावरणाची विटंबना, अन्नधान्याचो उणाव, मोबायलाचें व्यसन आनी शारिरीक निश्क्रीयतायेक लागून मनशाची भलायकी संकटांत सांपडल्या. अशा जागतीक आव्हानांक तोंड दितना भारताक उदरगती कडेन व्हरपाक तरणाट्या फुडाऱ्यांची म्हत्वाची भुमिका आसा,” अशें तांणी फुडें सांगलें. तेच बरोबर हाजीर आशिल्ल्या तरणाट्यांक प्रेरणा दितना राष्ट्र आनी समाजा कडेन आशिल्ले तांचे जापसालदारकेची तांकां जाणविकाय करून दिली. स्वच्छ भारत, विद्यार्थी इंटर्नशिप आनी संस्थात्मक नवनिर्माण मंडळाच्या उपक्रमांत विद्यार्थ्यांनी सक्रीय वांटो घेवंक जाय अशेंय तांणी सांगलें.
महाविद्यालयाचे प्राचार्य प्रो. जेर्वासियो मेंडीस हांणी येवकाराचें उलोवप केलें. मुखेल सोयऱ्यांची वळख तांणीच करून दिली. शांतपणान वेंचणूक घडोवन हाडिल्ले खातीर विद्यार्थ्यांक आनी प्राध्यापकांक परबीं दिली तशेंच विद्यार्थी मंडळ सर्वसमावेशक केल्ले खातीरूय तुस्त केली.
विद्यार्थी कल्याण समितीचे संयोजक प्रशांत भोसले हांणी विद्यार्थी मंडळ वांगड्यांची आनी समिती वांगड्यांची वळख करून दिली. विद्यार्थी मंडळाच्या नव्यान स्थापन जाल्ल्या वांगड्यांक प्राचार्यान सोपूत दिलो.
प्रवीण जेम्स सरचिटणीस म्हूण वेंचून आयला. ताणें आपल्या स्वीकार भाशणांत विद्यार्थ्यांक तांच्यो समस्या आपले तांकीन सोडोवपाचें आश्वासन दिलें. विद्यार्थ्यां खातीर तांची एकंदर उदरगत घडोवन हाडपा खातीर खेळ आनी कुशळटाय वाडोवपाक कार्यावळी सुरू करपाचे येवजणे विशीं सांगलें. विद्यार्थी आनी संस्थेचें वेवस्थापन हांचे मदलो पूल जावपाचें वचनय तांणे दिलें.
रुद्रा वेलिंगकार ही बायल प्रतिनिधी, दत्तराज चणेकार हो सांस्कृतीक सचीव आनी राकेश मल्लापूर हो खेळां सचीव म्हणून वेंचून आयला. महाविद्यालयाची उपप्राचार्य प्रो. सोनिया सिरसाट (शिक्षणीक), अशोक चोडणकार (प्रशासन) तशेंच हेर प्राध्यापक ह्या सुवाळ्याक वर्ग हजर आशिल्ले. सेजल डिचोलकार आनी योगिता गवंडी हांणी सादर केल्ल्या येवकार नाचान आनी दिवली पेटोवन कार्यावळीची सुरवात जाली. दत्तराज चणेकार हाणें उपकाराचें उलोवप केलें. समृद्धी गणपुले हाणें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
