भांगरभूंय | प्रतिनिधी
भांगरभूंय । प्रतिनिधी
वाळपयः आपल्या वावराचो विस्तार करून हेर मळार पावल घालपाचें सत्तरी अर्बन को-ऑपरेटिव्ह पत पुरवण सोसायटीच्या संचालक मंडळान थारायलां. ते खातीर सोसायटीच्या नेमांत बदल केला. सोसायटीच्या वाळपयच्या लक्ष्मीबाय सभाघरांत जाल्ले वर्सुकी साबार बसकेंत अध्यश्र यशवंत गांवस हांणी ही म्हायती दिली. राज्यांत सोसायटीचे 14 फांटे आसात. ताचो वेव्हार बरे भशेन चल्ला अशें तांणी सांगलें.
रीण दिवपा वांगडाच हेर मळार काम करपाची सुचोवणी सोसायटीच्या वांगड्यानी चार वर्सां आदी सूचोवणी केल्ली. तशें करपा खातीर सोसायटीच्या नेमांत बदल केल्यात. सोसायटीच्या नांवांत बदल करून तें सत्तरी अर्बन मल्टीपर्पज कॉपरेटिव्ह सोसायटी अशें केलां. हेर मळार काम करपाक आमी रोखडेच सुरवात करतले अशें गांवस हांणी वांगड्यांक सांगलें.
रोजगार निर्मणी करपी वेवसाय सुरू करपा खातीर रीण दिवपाक प्राध्यान दिवपाचें संचालक मंडळान थारायलां. बेरोजगारांक स्वताचो वेवसायस सुरू करपाक सदळपणान रीण दिवपाचो आमचो विचार आसा. कामाचो विस्तार करपाची संद खंय आसा हाचो अभ्यास करतले अशें तांणी सांगलें. सोसायटीकडेन 975 लाखाचें भागभांडवल आसा. सोसायटीन आतां मेरेन 180 कोटी रुपयांचो फायदो मेळयला अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
