भांगरभूंय | प्रतिनिधी
रमेश तवडकारः लोककला पर्जळीत करपाचे यत्न
भांगरभूंय । प्रतिनिधी
केपें: राजकी मळा वयलें पद केन्नाच सासणा खातीर आसना. लोकांचे इत्सेचेर सगळें निंबून आसता. संस्कृती सांबाळपी मनीस केन्नाच लिपून उरना. केन्ना ना केन्ना तो येसस्वी जाताच. आदले उपमुख्यमंत्री चंद्रकांत कवळेंकार करता तो संस्कृती संवर्धनाचो वावर तोखणाय करपा सारको. वेगवेगळ्या मळा वयल्या कलाकारांक तांचे वरवीं माची मेळटा. लोककला फुगडी आनीक पर्जळीत करपाचो आपूण यत्न करतां, अशें सभापती रमेश तवडकार हांणी सांगलें.
कवळेंकार हांच्या घरा चवथी निमतान आयोजीत 27 व्या राज्य पांवड्या वयली घुमट आरती, फुगडी, भोवढंगी भेस आनी रांगोळी सर्तीच्या इनामां भेटवण सुवाळ्यांत सभापती तवडकार मुखेल सोयरे म्हूण उलयताले. तांचे वांगडा माचयेर आदले उपमुख्यमंत्री चंद्रकांत कवळेंकरा, जिल्हो पंचायत वांगडी शाणू वेळीप, भाजपा म्हणयारे उर्फान मुल्ला, खोतीगांवचे सरपंच आनंद देसाय, दवर्लीचे सरपंच पाकलो हर्कुलीस, परिक्षक विजयकुमार कोप्रे देसाय, सुनील फातर्पेंकार, एकनाथ गांवकार, तुकाराम गोवेकार, संवसारीक नामनेचे रांगोळी कलाकार आकाश नायक आनी हेर मानेस्त हाजीर आशिल्ले.
चवथी निमतान कवळेंकार कुटुंबा वतीन तांच्या घरा आयोजीत केल्ले फुगडी सर्तीचें उक्तावण भाजपा प्रदेशाध्यक्ष सदानंद तानावडे हांचे हस्तुकीं केलें. भोवढंगी भेस सर्तीचें उक्तावण राज्यसभा खासदार विनय तेंडुलकार हांणी केलें जाल्यार रांगोळी सर्तीचें उक्तावण आमदार जेनिफर मोंसेरात हांणी केलें. ह्या वेलार माचयेर वास्कोचे आमदार दाजी साळकार, उत्तर गोंय जिल्हो पंचायत अध्यक्ष सिद्धेश नायक, भाजपा राज्य युवा मोर्चा अध्यक्ष समीर मांद्रेंकार आनी हेर मानेस्त हाजीर आशिल्ले.
घुमट आरती सर्तीचें उक्तावण नावेलीचे आमदार उल्हास तुयेंकार हांचे हस्तुकीं जालें. ह्या वेळार माचयेर भाजपा सचीव दामोदर नायक, आदले आमदार विल्फ्रेड डिसा, क्लाफासियो डायस, सर्वानंद भगत आनी हेर मानेस्त हाजीर आशिल्ले.
सर्तींचो निकाल फुडें दिल्ले प्रमाण. घुमट आरती सर्तः पयलें इनाम साई समर्थ आरती मंडळ, मडगांव, दुसरें- वईरंगी नवगदुर्गा आरती मंडळ, मडकय आनी तिसरें इनाम- कोकणपायक आरती मंडळ, मोरपिर्ला.
फुगडी सर्तः पयलें इनाम- भुमिका कलासंघ, भोम फोंडें, दुसरें- इँद्रेश्वर युथ क्लब, गांवडोंगरी काणकोण आनी तिसरें इनाम- महालक्ष्मी सेल्फ हेल्प ग्रुप, बार्से केपें.
रांगोळी सर्तः पयलें इनाम- भुमेश नायक, दुसरें- अर्जुन नायक आनी तिसरें इनाम- दर्शन नायक.
भोवढंगी भेस सर्तः पयलें इनाम- दित्या शिरवयकार, दुसरें- अनुष्का मोरजकार आनी तिसरें इनाम- कन्या नायक.
केपें मतदारसंघ मर्यादीत आरती सर्तः पयलें इनाम- कोणपायक आरती मंडळ, मोरपिर्ला आनी दुसरें इनाम- विघ्नहर्ता आरती मंडळ, बार्से केपें. खुशाली वेळीप हांणी सुत्रसंचालन केलें जाल्यार विजयकुमार कोप्रे देसाय हांणी उपकार मानले.
संस्कृती तिगोवपाचो यत्नः कवळेंकार
आमची संस्कृती तिगोवन उरची आनी कलाकारांचे कुशळटायेक संद मेळची ह्या एकाच उद्देशान ह्यो सर्ती घेतां. युवा पिळगेक भारतीय संस्कृती आनी परंपरेचें म्हत्व पटोवन दिवचे खातीर आपलें कुटुंब फाटल्या 27 वर्सां सावन अशा सर्तींचें आयोजन करता. कलाकारूय ताका उत्कृश्ट तेंको दिता, अशें आदले उपमुख्यमंत्री चंद्रकांत कवळेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
