भांगरभूंय | प्रतिनिधी
दिवचलः चवथी उपरांत मुख्यमंत्री प्रमोद सावंत हांणी 10 सप्टेंबर सावन जनता दरबार परतून सुरू केला. गोंयांतल्या विवीध वाठारांतल्या लोकां कडेन तांणी संवाद करून तांच्यो समस्या समजून घेतल्यो. ह्या वेळार खूबशा जाणांनी आपले प्रस्न, गाराणीं तांचे मुखार मांडली.
सेसा वेदांता कंपनीच्या सुमार इकराशीं कामगारांचेर संकश्ट आयलां. ह्या कामगारांक चडांत चड मजत मेळची हे खातीर आमदार डॉ. चंद्रकांत शेट्ये हांणी कामगारांच्या प्रतिनिधींची मुख्यमंत्र्यां कडेन चर्चा घडोवन हाडली.
हे संबंदांत मजूर आयुक्त राजू गांवस तशेंच कंपनी अधिकाऱ्यां कडेन विशेश बसका घेवन कामगारांक कशे तरेन चडांत चड फायदो मेळोवन दिवपाक मेळटलो हे विशीं यत्न करतां, अशी हमी मुख्यमंत्र्यान दिल्या. दिवचलेच्या सुमार 350 तशेंच हेर वाठारांतल्या सुमार 1100 कामगारां मुखार रोजगाराचो प्रस्न निर्माण जाला. म्हालांतल्या तशेंच विवीध वाठारांतले सरपंच, पंच वांगड्यांची भेट घेवन मुख्यमंत्र्यान उदरगत येवजण्यांचो नियाळ घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
