भांगरभूंय | प्रतिनिधी
आशिया करंड क्रिकेट सर्तीची फायनल आयज पाकिस्तान आनी श्रीलंका ह्या पंगडां मदीं जातली. मॅच दुबय आंतरराष्ट्रीय स्टेडियमाचेर जातली.
भारत आनी पाकिस्तान ह्या पंगडां मदीं फायनल जातली अशी क्रिकेट मोग्यांक आस्त आशिल्ली. पूण, सुरवातीचे मॅचींत अफगाणिस्ताना कडल्यान हार घेवपी श्रीलंकेन उपरांत जबरदस्त पुनरागमन केलें. ताणें भारता सारक्या बळिश्ट पंगडाक हारोवन फायनलींतली सुवात निश्चीत केली. श्रीलंकेन हालींसाराक केल्लें प्रदर्शन पळयलें जाल्यार तो फायनलींत पावतलो अशें कोणाकूच दिसूंक नाशिल्लें.
समाजीक, अर्थीक संकश्टां आड झुजपी आनी आपल्या इतिहासांतल्या सगल्यांत वायट लोकशाय अशांततायेक तोंड दिवपी श्रीलंके खातीर आपलो क्रिकेट पंगड हांगा मेरेन पावप म्हणल्यारूच ताचें एक व्हड येस अशें म्हणचें पडटलें. हो पंगड आपल्या देशाक खोशी मनोवपाक संद दिवपाक शकता. पूण, ते खातीर ताणें फायनलींत पाकिस्ताना सारक्या पंगडाक हारोवचें पडटलें.
खरें पळोवपाक गेल्यार श्रीलंका आशिया करंड क्रिकेट सर्तीचो येजमान आशिल्लो. पूण, सुरक्षा कारणांक लागून सर्तीचें आयोजन करपाक मेळूंक ना आनी अशे तरेन संयुक्त अरब अमिराताक सर्त आयोजीत करपाची संद मेळ्ळी.
दासुन शनाकाच्या फुडारपणाखाला खेळपी श्रीलंका घरच्या मैदानाचेर फायनल खेळिल्ली जाल्यार तांच्या क्रिकेट मोग्यां खातीर हो एक सुखद खीण आसतलो आशिल्लो. पूण, सुपर चारांतलें ताचें प्रदर्शन पळयलें जाल्यार पाकिस्ताना खातीर ही मॅच सोंपी आसची ना मात तितलेंच खरें आसा.
सुपर चारांतले निमाणे मॅचींत श्रीलंकेन पाकिस्तानाक 5 विकेटींनी हारयिल्लो. ह्या जैतान श्रीलंकेचो आत्मविस्वास आनीक वाडला आसतलो. पूण, दुबय जावपी फायनलींत पाकिस्तानाक लेगीत तेंको मेळपाची शक्यताय आसा. ह्या तेंक्याच्या नेटार बाबर आजम, मोहम्मद रिजवान, मोहम्मद नवाज आनी नसीम शाह सारके खेळगडे आपलें सर्वोत्कृश्ठ प्रदर्शन करपाक सोदतले.
श्रीलंका आपले क्रिकेटीक पुनर्जिवीत करपाच्या यत्नांत आसा. 2014त ताणें संवसारीक टी-20 सर्त जिखिल्ली. पूण, फाटल्या कांय वर्सांनी चुकीच्या खेळगड्यांची निवड आनी मंडळांतल्या राजकारणाक लागून पंगडाक झुजचें पडलां. पूण, खेळगड्यांनी आतां टी-20तलो आपलो दृश्टीकोण बदल्ला आनी तातूंत आक्रमकताय जोडल्या.
दुशमंत चमीरा सारक्या अणभवी बॉलराचे गैरहाजेरेंत लेगीत श्रीलंकेचें आक्रमण घटमूट दिसता. जाल्यार बॅटींग फळयेंत कुशल मॅण्डिस आनी पाथुम निसांका सारके जबरदस्त ओपनर आसात. दनुष्का गुणथिलका, भानुका राजपक्ष, शनाका आनी चमीरा करुणारत्ने हांणी लेगीत आपलें योगदान दिलां.
आशिया करंड सर्तींतल्या पांच मॅचींनी खेळटना श्रीलंकेन 28 सके आनी 62 चवके मारल्यात. हातूंतल्यान पंगडान आक्रमक रूप आपणायलां हें स्पश्ट जाता.
दुसरे वटेन पाकिस्तानाक आपलो मुखेली बाबर आजमाच्या फॉर्माचो हुस्को जाला. ताणें आतां मेरेन पांच मॅचींनी खेळटना फक्त 63 धांवड्यो केल्यात. पूण, फायनलींत निश्चीत रितीन व्हड खेळी करपाक तो इत्सूक आसतलो. बॉलींग विभाग पाकिस्तान बळिश्ट दिसता. नसीम शाहाच्या खेळांत सातत्यान सुदारणां जावपाक लागल्या. जाल्यार हॅरीस राउफ आनी मोहम्मद हसनैन हे लेगीत बरें प्रदर्शन करीत आसात. ताचे दोनूय स्पिनर शादाब खान आनी मोहम्मद नवाज हांणी लेगीत बरें प्रदर्शन केलां.
दुबय जावपी मॅचींनी टॉस म्हत्वाची भुमिका वठयता. पयलीं बॅटींग करपी पंगडाक चडशे खेपे लुकसाण जालां. पाकिस्तानाचें लेगीत पयलीं बॅटींग करतना बरें प्रदर्शन जावंक ना. ताणें पयलीं बॅटींग करतना भारत आनी श्रीलंके आडच्यो मॅची वगडायल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
