भांगरभूंय | प्रतिनिधी
ख्रिस्तोफर फोंसेकाः मुख्यमंत्र्यान दखल घेवपाची मागणी
भांगरभूंय । प्रतिनिधी
पणजीः गोवा चेंबर ऑफ कॉमर्साच्या अध्यक्षान किमान वेतनाचेर जें स्पश्टीकरण दिलां, तें चुकीचें आसा. फाटलीं 6 वर्सां कामगारांच्या किमान वेतनांत वाड जावंक ना. म्हारगाय वाडल्या, खर्चूय वाडले, पूण कामगारांचो पगार मात वाडूंक ना. मुख्यमंत्र्यान हाची दखल घेवन कामगारांच्या किमान वेतनांत ताकतिकेन वाड करची, अशें आयटकचे संयोजक कामगार फुडारी अॅड. ख्रिस्तोफर फोंसेका हांणी सांगलें. दिल्ली तशेंच हेर राज्यांनी किमान वेतन गोंया परस चड आसा. ताका लागून अशिक्षितांक 750, उणे शिकिल्ल्यांक 825, शिकिल्ल्या कामगारांक 910 आनी उच्च शिक्षीत कामगारांक 1 हजार अशें किमान वेतन लागू करचें. किमान वेतन लागू केल्ल्यान गोंयांत एकूय कंपनी, कारखानो अजून मेरेन बंद पडूंक ना. ताका लागून जीसीसीआयच्या अध्यक्षान केल्लें विधान चुकीचें आसा. खूबश्यो कंपनी कामगारांची सतावणूक करतात. तांका वेळार पगार वाडयनात. कंत्राटी तत्वाचेर तांकां कामाक दवरतात. हाची दखल कामगार आयोगा वतीन घेवची, अशें ख्रिस्तोफर फोंसेका हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
