भांगरभूंय | प्रतिनिधी
संवसारीक क्रमवारींत पयले सुवातेर आशिल्ली इगा स्वियातेक आनी विम्बल्डनांतली उप वस्ताद ओन्स जेबूर हांचे मदीं अमेरिकन ओपनाच्या बायलांच्या एकोड्या गटांतली फायनल जातली.
जेबूरान जबरदस्त प्रदर्शन करतना कॅरोलीन गर्सियाक 6-1 आनी 6-3 अशा सरळ सेटांनी हारोवन सेगीत दुसरे ग्रॅण्ड स्लॅम सर्तीचे फायनलींत सुवात मेळयली. तशेंच गर्सियाची सेगीत 13 मॅची पसून चालू आशिल्ली जैताची धांव आडायली. ट्युनिशियाची ही खेळगडी आयज जावपी फायनलींत स्वियातेका आड खेळटली.
स्वियातेकान पयलो सेट वगडायल्या उपरांत सव्या सिडा वयले आर्यना सबालेंकाक 3-6, 6-1 आनी 6-4 अशा सेटांनी हारयली. स्वियातेका तिसऱ्या सेटांत लेगीत फाटीं पडिल्ली. पूण, तिणें अखेरच्यो चार गेमी जिखून फायनलींत सुवात मेळयली. तिणें निमाण्या 20तले 16 पॉयण्ट आपल्या नांवार केले.
स्वियातेका हाचे पयलीं अमेरिकन ओपनाची चवथी फेरी हुपपाक जमूंक नाशिल्ली. पूण, पोलंडाचे हे खेळगडयेन दोन खेपे फ्रॅंच ओपनाचो किताब जिखला. दुसरे वटेन 28 वर्सां पिरायेची जेबूर 1968 पसून सुरू जाल्ले प्रॉफेशनल युगांत अमेरिकन ओपनाचे फायनलींत खेळपी पयली आफ्रिकीन खेळगडी थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
