दोन बेकायदो बांदकामा, मात कारवाय करपाक दोन फुटपट्ट्यो

भांगरभूंय | प्रतिनिधी

भांगरभूंय । प्रतिनिधी
म्हापशेंः दोन बेकायदेशीर बांदकामा, मात ती मोडपाचे बाबतींत सरकारी यंत्रणा दोन वेगवेगळ्यो फुटपट्यो वापरता हें दिसून आयलां. कोलवा हांगच्या बेकायदो हॉटेल सिल्वर सेंडाचेर सरकारी यंत्रणा अजून कारवाय करपाक शकना तीच यंत्रणा कर्लीसाचें बांदकाम मोडून उडोवपाक मात घाई करपाक लागल्या.
हॉटेल सिल्वर सेंडाचें बांदकाम मोडून उडोवपाचो गोंय दर्या देग विभाग वेसस्थापन प्राधिकरणाचो (जीसीझेडएमए) 2018 वर्साचो आदेश सर्वोच्च न्यायालयान उखलून धरलो. तशेंच ताचे आड 2019 वर्सा केल्ली याचिकाकूय भायरायली. मात हें बांदकाम मोडून उडोवप सरकारी यंत्रणेक अजून शक्य जाल्लें ना.
कर्लीसाचें बांदकाम मोडून उडोवपाचो राष्ट्रीय हरीत लवादाचो (एनजीटी) आदेश 8 सप्टेंबराक आयलो आनी एके रातींत तें बांदकाम मोडून उडोवपाची तयारी सरकारी यंत्रणेन केली. हणजुणा सकाळी 7 वराचेर हे कारवायेक सुरवात केली. हॉटेल सिल्वस सेंडाचें बांदकाम मोडून उडोवपाक आयिल्ल्या अपेशा खातीर बुधवारा एनजीटीन जिल्हो प्रशासन आनी जीसीझेडएमएच्या अधिकाऱ्यांक ओडीर काडलें. चुकार अधिकाऱ्यांचेर कारवाय करपा खातीर चवकशी सुरू करपाक एनजीटीन राज्याच्या मुख्य सचिवाक सांगलां.
भाजपा फुडारी सोनाली फोगटाक मरण आयिल्ल्यान कर्लीसाचें  बांदकाम मोडून उडोवपाची सरकाराक घाई जाल्या, असो प्रश्न आतां उप्रासला. कर्लीसांत हजारांनी लोक वतात. कायद्याची राखण करपी पुलीस थंय जाय तेन्न येवपाक-वचपाक शकतात. दोन बेकायदो बांदकामां विशीं सरकाराची कृती पळोवन कितें चल्लां तें सांगपाक जायना अशें कर्लीस रेस्टॉरंटाचो जोड धनी डेव्हीड डिसौझा हांणी सांगलें.
2001च्या रिजनल प्लॅनांत हणजुणेचो सगळ्यो दर्या देग वाठार सेटलमेंट झोन म्हणून दाखयला. कर्लीसाच्या शेजरा कितलेशेच क्लब, रेस्टॉरंटां आसात. शिवा व्हॅली, यूव्ही बार, लिलिपूट, आवावा हांचो तातूंत आसपाव आसा. हणजुणे- वागातोर दर्या देगेर नवी दिल्लींतल्या वेवसायिकांचे क्लब, रेस्टॉरंटा आसात, तांचेर कारवाय कित्याक जायना असो थळाव्या रवी हरमलकाराचो प्रश्न आसा. वागातोर- ओझरांत हांका नवी दिल्लीच्या एका राजकारण्याची कितलीशींच बेकायदो रेस्टारंटा आसात. ताचेर कारवाय करपाक सरकार कित्याक फाटी-फुडें पळयता. 30 वर्सांच्या कर्लीसाचेर कारवाय कित्याक जाता अशें तांणी विचारलां.