भांगरभूंय | प्रतिनिधी
भांगरभूंय । प्रतिनिधी
वास्कोः गोंयांत सॅक्स ट्रॅफिकींग आनी चलयांची सोडवणूक करपाचें प्रमाण देशांत सगल्यांत चड आसा. मात गुन्यांवकारां ख्यास्त करपाचें प्रमाण मात शून्य आसा, असो दावो अन्याय रहित जिंदगी ह्या एनओजीचे जोड संस्थापक अरूण पांडे हांणी केला.
गोंयांतल्या सॅक्ट ट्रॅफिकींगाचेर आळाबंद हाडपा खातीर सरकारान लिंगीक वेव्हांरात आशिल्ल्या दलालांचेर कारवाय करपा कडेन चड लक्ष दिवपाक जाय. तशेंच न्यायालयांत तांचेर केशी घालपा खातीर बळी पडिल्ल्या चलयांक उर्बां दिवन तयार करपाक जाय अशें तांणी शुक्राराक पत्रकारां कडेन उलयतना सांगलें.
सॅक्स ट्रॅफिकींगा आड आमी वावुरतात. गोंयांत ट्रॅफिकींग आनी चलयांच्या सोडवणुकेच प्रमाण देशांत सगल्यांत चड आसा अशें एनसीआरव्हीच्या 2021च्या अहवालांत नमूद केलां हांचें आमकां अजाप दिसलें ना. सॅक्स ट्रॅफिकींगां आड कारवाय करून चलयांची व्हडा प्रमाणात सोडवणूक केल्ले खातीर गोंय पुलिसांक परबीं भेटोवपाक जाय अशें पांडे हांणी सांगलें.
लिंगीक वेव्हारांत घुस्पल्ल्यांक पुलीस अटक करतात मात फुडें तांकां बंदखणीच्या ख्यास्त वा हेर दंडात्मक कारवाय जायना ही दुर्दैवी गजाल आसा. गोंय हें मुखेल पर्यटन थळ आशिल्ल्यान लिंगीक वेव्हारा खातीर हेर राज्यांतल्या व्हडा प्रमाणांत चलयांक हाडटापाचे प्रकार जातात. असले वेव्हार करतल्यांक ख्यास्त जाल्ली दिश्टी पडना. ताका लागून तांका जल मेळता. खर ख्यास्त जाता अशें दिसल्यार सॅक्स ट्रॅफिकींगाचेर आळाबंद येवपाक शकता अशें मत पांडे हांणी उक्तायलें.
दलालांच्या हातांतल्या चलयांची सोडवणूक केली म्हणटगीर पुलिसांचें काम सोपता आनी न्याय वेवस्थेचें काम सुरू जाता. गुन्यांवकारांक ख्यास्त कित्याक जावपाक शकना हें सरकारान पळोवपाक जाय. इतल्या व्हडा प्रमाण गुन्यांव नोंद जावंन लेगीत गुन्यांवकारांक ख्यास्त जावपाचें प्रमाण शून्य कित्याक हाचो पुरायपणान अभ्यास करपाक जाय. सोडवणूक केल्ल्यो 93 टक्के चलयो हेर राज्यांतल्यो आशिल्ल्यान न्यायालयांत पुरावे सादर करप शक्य जायना. ताका लागून गुन्यांवकार सुटतात. ह्या चलयांक न्यायालयांत साक्ष दिवपा खातीर तयार करून तांका गोंयांत येवपाचो आनी वचपाचो तशेंच रावपाचो आनी खावपाचो खर्च सरकारान करपाक जाय. तशें केल्यार सॅक्स ट्रॅफिकींगांत घुस्पल्ल्यांक ख्यास्त करप शक्य जातलें आनी ट्रॅफिकींगाचेर आळाबंद येतलो अशें अरूण पांडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
