भांगरभूंय | प्रतिनिधी
फायनलीचे सर्तींतल्यान पयलींच भायर पडिल्ल्या भारतान आशिया करंड क्रिकेट सर्तींतली अखेर जैतान केली. भारतान आपले निमाणे सुपर चारांतले मॅचींत अफगाणिस्तानाक एकवटेन जाल्ले मॅचींत 101 धांवड्यांनी हारयलो.
मॅचींतलो खाशेलो खीण म्हणल्यार विराट कोहलीन आंतरराष्ट्रीय क्रिकेटींतलो आपलो 71वो शेंकडो पुर्ण केलो. कोहलीन सुमार तीन वर्सांनी आंतरराष्ट्रीय क्रिकेटींत शेंकडो मारलो. जाल्यार आंतरराष्ट्रीय टी-20तलो ताचो हो पयलोच शेंकडो थारलो.
कोहलीच्या नाबाद 122 धांवड्यांच्या नेटार भारतान निर्धारीत 20 ओव्हरींनी 2 विकेटी वगडावन 212 धांवड्यो केल्यो. रोहित शर्माचे गैरहाजेरेंत पंगडाचें फुडारपण करपी लोकेश राहुलान 62 धांवड्यांचें योगदान दिलें.
213 धांवड्यांचो फाटलाव करपी अफगाणिस्तानान 20 ओव्हरींनी 8 विकेटी वगडावन 111 धांवड्यो केल्यो. इब्राहीम जदरानान 62 धांवड्यो केल्यो. भारता वतीन भुवनेश्वर कुमारान सगल्यांत चड 5 विकेटी घेतल्यो. अफगाणिस्तानाचो पंगड कोहलीच्या स्कोरा परस 11 धांवड्यांनी फाटीं उरलो.
धांवड्यांचो फाटलाव करपी अफगाणिस्तानाच्या सुरवातीच्या बॅट्समनांनी निर्शेणी हाडली. स्विंगचो बादशा अशी वळख आशिल्ल्या भुवनेश्वर कुमारान अफगाणिस्तानाचो डाव गडगडावन उडयलो. ताणें चार ओव्हरींनी फक्त चार धांवड्यो दीत 5 विकेटी घेतल्यो. ताणें ओपनर हजरतुल्ला झझाई (0), रहमानुल्ला गुरबाज (0), करिम जनात (2), नजीबुल्लाह झाद्रान (0) आनी अजमतुल्ला ओमरझाई (1) ह्या पांच बॅट्समनांक तंबूंत धाडले. हेर बॉलरांनी लेगीत ताका बरी साथ दिली. अर्शदीप सिंगान, आर आश्विनान आनी दीपक हुड्डा हांणी दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
