भांगरभूंय | प्रतिनिधी
‘एनपीएस’ परिपत्रकाचेर साबार बसकेंत जातली चर्चा
भांगरभूंय । प्रतिनिधी
म्हापशें: म्हापशें पालिकेच्या सामान्य केडर कर्मचाऱ्यां खातीर राष्ट्रीय पेन्शन प्रणाली (एनपीएस) लागू करपा संबंदांत निर्णय घेवचे खातीर म्हापशें पालिका मंडळाचे साबार बसकेंत चर्चा जातली. जर ‘एनपीएस’ची अमलबजावणी केली जाल्यार पालिकेच्या खर्चाचेर अतिरिक्त वजें पडटलें.
मेळिल्ले म्हायती प्रमाण नवे पेन्शन येवजणे खाला नागरी थळावी स्वराज्य संस्थांची राज्य स्वायत्त संस्था म्हूण नोंदणी, हे विशीं नगरपालिका प्रशासन संचालनालयान परिपत्रक जारी केलां. ज पालिकेन राष्ट्रीय निवृत्ती वेतन प्रणाली आपणायली ना जाल्यार पगार बंद जातले आनी सामान्य वर्गांतले अभियंते आनी लेखापालांक पालिका निधींतल्यानूच पगाराचो भार पालिकेक सोंसचो पडटलो, अशें तातूंत नमूद केलां.
आतां मेरेन अभियंते आनी लेखापालां सयत सामायीक वर्गांतल्या कर्मचाऱ्यांचे पगार राज्य सरकारा कडल्यान वेतन अनुदाना वरवीं दिताले. हे कर्मचारी थेट सरकारा वतीन नेमतात. पूण ही प्रणाली आपणायली जाल्यार पालिकेच्या भुजाचेर सुमार 65 लाख रुपयांचें अर्थीक वजें पडटलें. लेखा आनी प्रशासकीय अधिकारी, पालिका अभियंते हांचे पगार लेगीत पालिका निधींतल्यान दिले जाल्यार 24 लाख रुपयांचें अतिरिक्त वजें पालिकेचेर पडटलें. ह्या अधिकाऱ्यां कडेन पालिका पदाचो अतिरिक्त ताबो आसतलो. 12 सप्टेंबराक म्हापशें पालिका मंडळाची साबार बसका जातली.
‘एनपीएस’चे अंमलबजावणेक विरोधः अॅड. नार्वेंकार
‘एनपीएस’चे अंमलबजावणे विशीं पालिकेक पालिका संचालनलाय कडल्यान परिपत्रक मेळ्ळां. तें पालिका मंडळाचे साबार बसकेंत चर्चे खातीर दवरतले, पूण ताका आमी विरोध करतले. सध्या पालिका अर्थीक वेवस्था वेवस्थापीत करपाक सक्षम ना. पालिकेच स्वताच्या कर्मचाऱ्यांचो पगार वेळार दिवपाक कठीण जाता. अशे स्थितींत हो रॉमन कर्मचाऱ्यांचो अतिरिक्त भार पालिका सोंसपाक शकची ना, अशें नगरसेवक अॅड. शशांक नार्वेकार हांणी हें संबंदांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
