भांगरभूंय | प्रतिनिधी
म्हापशें: पानेली पोरण्या गोंया रावपी दिनेश दाफ्रे (मूळ मुंबय) हाका वेगवेगळ्या अॅपांचेर रीण दिवपाच्या निमतान आनी उपरांत बदनामी करून 1.68 लाखांक तोपी घातली. ह्या प्रकरणांत सायबर क्रायम विभागान अज्ञाता आड गुन्यांव दाखल केला.
फिर्यादी दिनेश दाफ्रे हांणी इंटरनॅटा वयल्या एका अॅपाचेर ल्हानशें रीण घेतिल्लें. ते रीण तांणी वेळारूच फारीक केल्लें. तरी लेगीत दुबावितान अल्टेरंडा लोन, ऑरेंज लोन, हेडसी लोन, हार्मनी लोन, रुपीवे लोन, ट्राकू लोन, डोमिनी लोन, यश कॅश हे अॅप डावनलोड करपाक लायले. तशेंच ताचो फोटो आतंकवादी म्हूण सोशल मिडियाचेर व्हायरल करपाची फिर्यादीक धमकी दिली. ते भायर फिर्यादीच्या कांय कॉण्टेक्ट लिस्टांतल्या लोकांक तो फोटो धाडून ताची बदनामी केली आनी ताचे कडल्यान वयल्या अॅपांचेर गुंतवणूक करून 1.68 लाख सुतलायले. आपली फटवणूक आनी बदनामी जाल्ल्याचें लक्षांत येताच फिर्यादीन 7 सप्टेंबराक सायबर गुन्यांव विभागांत वचून कागाळ केली. हे कागाळेच्या आदारान विभागान अज्ञात दुबाविता आड गुन्यांव नोंद केलो. ह्या प्रकरणांत पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
