भांगरभूंय | प्रतिनिधी
पणजीः कदंबा म्हामंडळ आनी पेटीएम कंपनी वतीन कदंबा प्रवासा खातीर क्यूआर कोड सुरू केल्लो, पूण प्रवाशां मदीं हे विशीं उणी जागृताय जाल्ल्यान आतां मेरेन फक्त 1,600 लोकूच क्यूआर कोडाचो वापर करतात.
ही पद्दत सुरू करून आतां स म्हयने जाले तरीय अजून प्रवाशांचो हाका बरो प्रतिसाद मेळना. कंडक्टराक तिकिटाचे पयशे काडप सोपें जावचें, तिकीट घोटाळो उणो जावचो हे खातीर कदंबा म्हामंडळान ही क्यूआर पद्दत चालीक लायिल्ली. ते खातीर कदंबा बसस्टॅण्डाचेर हे विशीं जागृताय लेगीत केल्ली. बशींत लेगीत कांय सिटांचेर क्यूआर कोड लायिल्ले, पूण प्रवाशांचो मात ताका प्रतिसाद मेळना. सगळ्या बसस्टॅण्डांचेर पेटीएम कंपनीचे कर्मचारी आसात. तांचे कडल्यान लेगीत हीं कार्डां करून दितात, पूण प्रवाशी मात ताका प्रतिसाद दिनात. सध्या जे 1,600 लोक क्यूआर कोडाचो वापर करतात, तातूंतले चडशे लोक दिसपट्टे कंदबा बशींतल्यान प्रवास करपी आसात. कदंबा बशींतल्यान दिसाक हजारांनी लोक प्रवास करतात. खूब जाणांनी ताका लागून कदंबा पासूय काडल्यात. पूण अजून प्रवाशी क्यूआर कोडाचो वापर करिनात. खूबशा देशांनी ही पद्दत आपणायल्या. कदंबा म्हामंडळान ही पद्दत सुरू केल्या खरी पूण खूबशा जाणांक ती कळना. तशेंच शिक्षीत लोक लेगीत ताचो वापर करिनात.
फुडारांत प्रवाशी क्यूआर कोड वापरतलेः घाटे
पेटीएमच्या क्यूआर कोडा विशीं लोकां मदीं जागृताय उणी जाल्या. आमी ते विशीं पेटीएम कंपनीच्या कर्मचाऱ्यांक सांगलां. हे विशीं आनीक जागृती करतले. सगळ्या बसस्टॅण्डांचेर ह्या क्यूआर कोडाविशीं लोकांक म्हायती दितले. ताका लागून फुडल्या काळांत व्हड प्रमाणांत लोक कदंबा तिकेट दिवपा खातीर पयशांचो वापर करिनासतना क्यूआर कोडाचो वापर करतले, अशें कदंबा म्हामंडळाचे सरवेवस्थापक संजय घाटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
