भांगरभूंय | प्रतिनिधी
भांगरभूंय । प्रतिनिधी
पणजीः बांबोळे गोंय वैजकी हॉस्पिटल वाठारांतल्या (जीएमसी) वाठारांतले गाडे काडून देड वर्स जायत आयले तरी तांची पुनर्वसणूक करपा खातीर बांदिल्ले गाडे संबंदीत गाडेवाल्यांक दिवपाचें काम अजून सरकारा कडल्यान जायना. मंगळारा गाडेवाल्यांच्या एका शिश्टमंडळान महसूल सचिवांची भेट घेवन ते गाडे आपले सुवादीन करपाची मागणी केली.
ह्या शिश्टमंडळांत डॉमनीक परेरा, शकुंतला चोडणकार आनी हेर गाडेवाल्यांचो आसपाव आशिल्लो. तिसवाडीच्या आदल्या उपजिल्होधिकाऱ्यान गाड्यांचे वितरण करपाची सगळे सोपस्कार केल्ले. मात ताची बदली जाल्ल्यान ही पक्रिया थांबली. महसूल सचीव संदीप जॅकीस हांणी मुख्यमंत्री डॉ प्रमोद सावंत हांचे कडेन चर्चा करून गाड्यांचे वितरण करपाचें उतर दिलां अशें परेरा हांणी पत्रकारांक सांगलें.
बांदून तयार आशिल्ल्या गाड्यांचें अजून वितरण जावंक नाशिल्ल्यान त्या वाठारांत आतां सगळे कडेन कोयर साठला. भाजी आनी हेर तरेचो कोयर थंय हाडून उडोवपाचें काम चल्लां. गाडे आमचे सुवादीन केल्या उपरांत थंयचो वाठार नितळ दवोरपाचें काम आमी करतले अशें गाडेवाल्याचें फुडारी आनी सान्ताक्रुजाचो उपसरपंच डॉमनीक परेरा हांणी सांगलें. व्हो वाठार नितळ दवोरपाची जापसालदारी पंचायतीची काय जीएमसीची हें अजून थारलें ना अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
