गोंयांत अपघातांत मरतल्याचें प्रमाण राष्ट्रीय सरासरी परस चड

भांगरभूंय | प्रतिनिधी

प्रसाद शेट काणकोणकार
भांगरभूंय
पणजी : गोंयांत 2021 वर्सा वेगवेगळ्या तरेच्या अपघातांत मेल्ल्यांचो आंकडो पळयल्यार तो राष्ट्रीस सरासरी परच चड आशिल्ल्याची म्हायती सामकार आयल्या. त्या वर्सा राष्ट्रीय सरासरी 29.1 टक्के आनी गोंयांतली 38.2 टक्के आशिल्ली. ताका लागून हो हुस्को करपाचो विशय जाला. ह्या वर्सा सैमीक अपघातांत तीन आनी हेर अपघातांत 593 जाणांक मरण आयलें. तातूंत सगल्यांत चड 180 जाण रस्त्या वयल्या अपघातांक लागून मेले. तांची पिराय 30 तें 45 वर्सा मजगतीं आशिल्ली.
राष्ट्रीय गुन्यांव रिकॉर्ड ब्युरोन (एनसीआरबी) आपल्या 2021च्या अहवालांत ही म्हायती दिल्या. राज्यांत 2021 वर्सा सैमीक तशेंच हेर अपघातांत 596 जाण मेले. तातूंत 516 दादले आनी 80 बायलांचो आसपाव आशिल्लो. 30 तें 45 वर्सां पिराचेच्या 180 जाणाचो तातूंत आसपाव आशिल्लो. 18 ते 30 वर्सा पिराये 168 जाण, 45 तें 60 वर्रां पिरायेचे 130 जाण आनी 60 वर्सा पयले पिरायेच्या 130 जाणाक 18 वर्सा सकयल्ल्या 8 जाणांक ह्या अपघातांत मरण आयलें.
रस्तो अपघातांत 226 रेल्वे अपघातांत 49 आनी लायटीचो शॉक बसून 25 जाणांक 2021 वर्सा मरण आयलें. 19 जाणांक अकस्मात मरण आयलें. तातूंत काळजाच्या आताकान मरण आयिल्ल्या 10 जाणांचो आसपाव आसा.
इमारती वा वाहनां वयल्यान पडून 102 जाणांक मरण आयलें. गॅस सिलिंडर स्फोटाक लागून एकलो आनी कारखान्यांत जाल्ल्या अपघातांत तीन जाण मेले. विखाची बादा जावन 6 जाण मेले, स्वास अंदून दोन जाण आनी घुंवळी वखदां चड प्रमाणात घेतिल्ल्यान दोन जाणांक मरण आयलें. 26 जाणांक हेर कारणांक लागून मरण आयलें अशें एनसीआरबीच्या अहवलांत म्हणलां.