भांगरभूंय | प्रतिनिधी
भांगरभूंय । प्रतिनिधी
पेडणेः मांद्रे पंचायत मंडळाचो सरपंच म्हणून आमदार जीत आरोलकार हांचे समर्थक अमीत सावंत हांची बिनविरोध वेंचून आयले. फाटल्या 22 ऑगस्टाक सरपंच म्हणून वेंचून आयिल्ल्या महेश कोनाडकरा आड 24 वरां भितर अविस्वास थाराव हाडून ताका खुर्चे वयल्यान देंवयल्ले उपरांत नवो सरपंच वेंचून काडपा खातीर पंचायत मंडळाची मंगळारा खासा बसका जाली.
कोनाडकार पंगडातली चेतना पेडणेकार हिका उपसरपंचपदा वयल्यान काडून ते सुवातेर तारा हढफडकार हिची निवड करपाची शक्यताय आसा. सरपंचपदा खातीर अमीत सावंत हांचोच उमेदवारी अर्ज आयिल्ल्यान निर्वाचन अधिकाऱ्यान ताची बिनविरोध निवड जाल्ल्याचें जाहीर केलें. सावंत हांचो सरपंच म्हणून दोन वर्सांचो कार्यकाळ निश्चीत केला.
सरपंच आनी उपसरपंचपद अलिखीत नेमा वरवीं सगल्या पंचांनी वांटून घेवपाचें थारायलां.
सरपंच म्हणून आपल्याक विरोधा विणे वेंचून दिल्ले खातीर अमीत सावंत हांणी पंच वांगड्याचे उपकार मानले. सरपंच म्हणून जी जापसालदारी पडल्या ती आपूण बरे भशेन पुराय करतलों अशें तांणी सांगलें. मांद्रें पंचायत वाठारांत दर्या देगांनी रेंव काडून जमीन सपाटीकरण करपाचे जे प्रकार चल्ल्यांत ताचेर कारवाय करपाचें उतर सावंत हांणी पत्रकारांनी विचारिल्ल्या प्रश्नाक जाप दितना दिलें. देवस्थानाच्या वाठारांत जी बेकायदो बांदकामां चल्ल्यांत ते संबंदी देवस्थान म्हाजना कडेन उलोवणी करतलों अशेंय तांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
