भांगरभूंय | प्रतिनिधी
अग्रलेख
————————
लोकशाय बळिश्ट करतलो जाल्यार एक तरी विरोधी पक्ष जाय. एक राष्ट्र, एक पक्ष आसप लोकशायेक मारक थारूं येता.
————————
कोणे खंयच्या पक्षांत वा संघटनेंत वचप, खंयची विचारसरणी बाळगप हो जाचो ताचो प्रस्न. आमच्या देशांत अजून लोकशाय आशिल्ल्यान कोण कोणाक फोर्सार करपाक शकना. 40 वर्सां पयलीं पक्षांचे फुडारी, वावुरपी तत्वां, निश्ठा हड्ड्या कडेन धरून जगताले. मतदारुय तांकां पळोवन भारावून वताले. त्या काळारूय पक्षांतरां जाल्यांत. पूण चडशे खांपे फुडारी, वावुरपी मरसर एकामेकांच्या पक्षांत वच्चे नात, हाची सगल्यांकूच खात्री आसताली…. आनी ताका वेर वचत अशें पावल संबंदीत फुडारी उखलिनाशिल्ले. कांय घराणीं थारावीक पक्षांचीं म्हूण गांवभर लोकप्रीय आशिल्लीं. मात, काळ बदल्लो. पयशांक म्हत्व आयलें. म्हारगाय वाडली. साहजिकूच जगपाक चड पयसो मोडचो पडपाक लागलो. मतदारांच्यो अपेक्षाय वाडल्यो. हातार कोण कितें उडयता तो तांकां देवदूत कसो दिसपाक लागलो. घांटी पोंदां उबे रावन उतर दिवपाचे प्रकार सोंपले (आतांय देव, गाराणे विसरपी फुडारी आसात.) आनी दुडवां प्रमाण मत थारूं लागलें. ल्हवू ल्हवू राजकारणाचो पांवडो निसरलो. आमचें गोंय उदरगतीचे बाबतींत नंबर वन आसा, अशें कांय संस्था दरवर्सा जाहीर करतात. गोंय पक्षांतरांतूय नंबर वन आसा, हें 1980 दशकाचें राजकारण पळयिल्ल्यांक सांगपाक नाका. शिमग्यांक गोफ नाचतना जशे तालगडे अळंग हेवटेनच्यान तेवटेन वतात, तशे मंत्री, आमदार पक्ष बदलूंक लागले. लोकांनी चार दीस गाळी संवल्यो, आतां तांकांय संवय जाल्या. तेय आतां व्हंकले वांगडा धेडी वच्ची, बोकडां फाटल्यान हेर बोकडां वच्चीं, तशे ‘जय हो’ म्हणीत तांचे फाटल्यान वतात. हालींचेंच उदाहरण घेयात. काँग्रेसीचे 10 जाण फुटले, भाजपांत गेले. भाजपांतले काँग्रेसींत, काँग्रेसीचे तृणमुलांत…. सद्या कोण खंयच्या पक्षाचो, तें मतदारांक याद जायना आसतलें. सगलोच घुस्पागोंदळ आनी घुसटमार.
आतां दिगंबर कामत, मायकल लोबो आनी हेर तीग जाण काँग्रेस पक्षांत वतात अशी परतून वावडी उडल्या. अर्थांत सगल्यांनी ही खबर न्हयकारल्या. कांय जाण दिल्लीक गेल्ल्याचे पुरावे मेळ्ळ्यात, पूण तांणी ‘मी नाही त्यातली, कडी लावा आतली’ भुमिका घेतल्या. कोणाक हेवटेन तेवटेन वचपाचें आसल्यार तांणी उक्तेपणी वचपाक जाय. सगलें स्वताच करपाचें आनी म्हाका बाबा कांय खबर ना म्हणपाचें राजकारणांत एकवेळ सोबता आसत, पूण नैतिकतेंत तें बसना. अर्थांत आतां सगल्यांनीच नैतिकताय सांतिनेजाच्या खारजांत बुडयल्या. खंयचोय फुडारी गेलो जाल्यार पक्षाक फरक पडटा. मत दिल्ल्या कांय मतदारांचोय तो अपमान थारता. पूण, आयच्या भोवतेक मतदारांक ताचें कांय पडिल्लें नासता. कारण आपलो लोकप्रतिनिधी सत्ताधारी पक्षांत गेलो, ताका बरेशेचें खातें मेळ्ळें जाल्यार आमचेय ताटलेंत कांय गोटे पडटले, हाची तांकां खात्री आसता. म्हूण चडशे सुशिक्षीत आनी अशिक्षीत ओग्गी बसतात. कितेंय उलयलो, जाल्यार लुकसाण जातलें, हें तांकां खबर आसता. देखून तोंडांत मिठाचो गळगळो घेवन तो थुकून दुसरो घोंट केन्ना घेवपाक मेळटलो, हाची वाट ते पळय बसतात.
फाटले फावट आठ जाण काँग्रेसीच्या झाडा वयल्यान भाजपाच्या रुखार उडकी मारपाचे आशिल्ले. पूण, थोडे मारूं काय नाका, हे दोट्टी मनःस्थितींत आशिल्ल्यान ही लांब उडी जाग्यारुच उरली. मात, आतां खंय सगले सराव करून आयल्यात. चड करून येसस्वी उडकी मारतलेच ते. कितें तें बेगीन करचें. म्हाळ म्हयनो लागीं पावला. उशीर केल्यार घटस्थापने मेरेन रावचें पडटलें. एका पक्षांतल्यान दुसऱ्या पक्षांत गेल्यार मतदारसंघाची अशी कितें उदरगत जाता, ते पक्षबदलूंकच खबर आसतली. तांची स्वताची मात उदरगत (उदर म्हणजे पोट) जाल्ली थळाव्या लोकांक जाणवता. लोकप्रतिनिधींचीय चूक ना. मतदारांच्या हातार सद्दां उडोवचें पडटा. आनी पयशे कितें झाडाक लागनात!! पक्षांतर जालें काय एकमेकां आड दोन हात केल्ल्यांची कांय काळ अडचण जाता. आतां पक्षांतरां जालीं जाल्यार काँग्रेस आमदारां आड लढिल्ले भाजपाचे उमेदवार उंचाबळ जातले. राज्य पांवड्या वयल्या भाजपा पक्षश्रेश्ठींनी, सगल्या पक्षांचे उमेदवार आमच्या पक्षांत आयल्यार ती बरी गजाल, अशें पयलींच स्पश्ट केलां. पूण, लोकशाय बळिश्ट करतलो जाल्यार एक तरी विरोधी पक्ष जाय. ‘एक राष्ट्र, एक पक्ष’ आसप लोकशायेक मारक थारूं येता.
–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
