भांगरभूंय | प्रतिनिधी
भारताचो शेजारी देश श्रीलंका अर्थीक संकश्टांत सांपडिल्ल्यान कितें जालें तें पुराय संवसारान पळयलां. आतां श्रीलंके उपरांत पाकिस्तानूय व्हड अर्थीक संकश्टांत सांपडला. तशें पळोवंक गेल्यार पाकिस्तानाची अर्थवेवस्था केन्नाच बळिश्ट नाशिल्ली. तांची अर्थवेवस्था चीन, अमेरिका आनी अस्तंती देशांच्या आदाराचेर तशेंच आंतरराश्ट्रीय नाणे निधीच्या आदाराचेर आदारून आशिल्ली. आतां आंतरराष्ट्रीय नाणे निधीन लेगीत पाकिस्तानाक अर्थीक मजत दिवप बंद केलां. अमेरिकेकाय पाकिस्तानाक फावो ती मजत करीना. अस्तंती देशांनीय आपले मजतीचे हात फाटीं घेतल्यात, तातूंत कोरोनाक लागून पाकिस्तानाची अवस्था सामकी बाबत जाल्या. मुळांत हो देश वयर काडपाक कोणे प्रामाणिकपणान यत्न केले नात. फक्त धर्म, दुसऱ्या धर्माचो दुस्वास, हिंसा, दुसऱ्या देशांनी बाॅम्बस्फोट हातूंतच तांचे दीस वतात.
कोरोनातल्यान थाकाय मेळटा थंय आसा, पाकिस्तानाक सैमान व्हड धपको दिला. पाकिस्तानाक सध्या हुंवाराचो व्हडलो धपको बसला. हुंवाराक लागून पाकिस्तानाची एक तृतीयांश जमीन उदकांत बुडल्या आनी ह्या पावसांत 1 हजारां परस चड लोकांक मरण आयलां. हजारांनी कुटुंबां विस्थापीत जाल्यांत. तांकां घरदार सोडचें पडलां. कांय जाणांची घरां व्हांवन गेल्यांत. गोरवां, बोकड्यो, गाढवां, उंट ह्या पशुधनाचें आनी शेतकी उत्पादनांचें सोंसपाक जायना इतलें लुकसाण जालां. हेर लुकसाणाचो हिशोबूच ना.
ह्या हुंवाराक लागून पाकिस्तानाचे दिवाळें वाजिल्ले अर्थवेवस्थेच्यो आनीक भंयोभयो जाल्यात. अन्नधान्य, कड्डण, भाजी, फळां, दूद, बेकरी उत्पादनां, इंधन हे पाकिस्तानांत खूब म्हारग जालां. हांगाच्या सामान्य नागरिकांक पेट्रोल- डिझेल लेगीत घेवंक परवडना. इतलें व्हड सैमीक संकश्ट आसून लेगीत पाकिस्तानाक संवसारांतल्यान फावोशी कसलीच मजत मेळना. फकत चीनान तितलो पाकिस्तानाक आदार केला. अमेरिके, कॅनडा आनी युरोपांतल्या कांय देशांनी पाकिस्तानाक अल्प प्रमाणांत मजत केल्या. ती कोणाक पावतली?
फाटलो अणभव मतींत घेवन भारतान हुंवारग्रस्त वाठारांतल्या नागरिकां विशीं दुख्ख उक्तायलां तरी आपलो आदार दिवपाक फावोसो हात सैल सोडूंक ना. हाचे पयलीं पाकिस्तानांत भूंयकांप जाल्लो तेन्ना भारतान पाकिस्तानाक मानवतावादी दिश्टीकोनांतल्यान मदत केल्ली, पूण पाकिस्तानान ती न्हयकारली. देखून हे खेपे भारतान पाकिस्तानाक अर्थीक मजत दिवपाचें टाळ्ळें.
खरें म्हणल्यार खंयच्याय देशांत सैमीक संकश्ट येता तेन्ना हेर देशांतल्यान त्या देशांत खूब आदार मेळटा. पूण पाकिस्तानाक फावो ती मजत हे खेपे मेळूंक ना. अशें कित्याक जालां, हाचो विचार पाकिस्तानान, खास करून धर्माचो बावटो हुबोवपी, विचारवंत, राजकी फुडारी आनी हेरांनी करचो. हाका पाकिस्तानूच जापसालदार आसा. सत्तेर येतकच प्रत्येक देशांतल्या सरकारान आपल्या नागरिकांचो सर्वांगी विकास कसो जातलो, हाचे कडेन लक्ष दिवपाक जाय. मात चडशे फक्त आपलें कशें सादतलें, हें पळयतात. हातूंत सुशिक्षीत लोकूच चड आसतात, हें दुर्दैव.
आतां मेरेन ज्या देशांनी पाकिस्तानाक मजत केल्या, ती पाकिस्तानी सरकार लोकांच्या कल्याणा खातीर वापरतले, हाची खात्री कितें? ती मजत लोकां बदला पाकिस्तानान आतंकवादाक पोसपा खातीर वापरल्या!! देखून खंयच्याच देशाक पाकिस्तान आपणें दिल्ली मजत योग्य सुवातेर वापरतलो, हाची खात्री ना. घडये ताकाच लागून कोणूच पाकिस्तानाक मजत करपाक कोण नेटान मुखार येनात.
आतां लेगीत इतलें व्हडलें संकश्ट आसून लेगीत पाकिस्तान आपल्या नागरिकांचो जीव राखनासतना काश्मीर देंगणांतल्या आकांतवाद्यांक आदार दिता. हें अशेंच चालूच उरलें जाल्यार फुडाराक पाकिस्तानी नागरिक रस्त्यार देंवन राज्यकर्त्यांक धांवडावन घालतले. श्रीलंकेंत केलें तशें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
