भांगरभूंय | प्रतिनिधी
भांगरभूंय । प्रतिनिधी
पणजीः घुंवळी वखदां बाळगिल्ले खातीर नायजेरियन ड्रग्स स्मगलर उगोचुक्वू सोलोमन हाका पणजेच्या उत्तर गोंय जिल्हो आनी सत्र न्यायालयान दोशी थारायला. ताका कितली ख्यास्त दिवपाची हाचेर 12 सप्टेंबराक सुनावणी जातली.
सोलोमन हाचेर कळंगुटे पुलिसांनी 5 डिसेंबर 2012 दिसा गुन्यांव नोंद केल्लो. तेन्नाचो पुलीस उपनिरीक्षक विवेक हळर्णकाराच्या पंगडान पोरबावाडो- कळंगुटे हांका निकिता रेडिडन्सी लागी ताका घुंवळी वखदांचो वेव्हार करतना धरिल्लो.
म्हापशेच्या न्यायालयान ताका 12 डिसेंबर 2012 दिसा सर्शत जामीन दिल्लो. ते उपरांत तो फरार जाल्लो. एनसीबीन सोलोमन आनी ताच्या एका वांगड्याक 28 ऑक्टोबर 2013 दिसा ताका परत अटक करून ताचे कडल्यान 451 ग्राम कोकेन जप्त केल्लें. तेन्नाय न्यायालयान ताका जामिनाचेर सोडिल्लें. 1 एप्रील 2016 दिसा न्यायालयान पुरावे नाशिल्ल्यान निर्दोश थारायल्लें.
हैदराबाद पुलिसांनी 17 ऑगस्ट 2016 दिसा ताका स नायजेरियन नागरिकां सयत अटक केल्ली. उपरांत न्यायालयान ताका सशर्त जामीन मंजूर केल्लो. सोलोमन हाचे आड जायते कडेन गुन्यांव नोंद जाल्ल्यान ताका दिल्लो जामीन रद्द करपाची मागणी पुलिसांनी न्यायालयांत केल्ली. ती मानून घेवन न्यायालयान ताका फरार घोशीत केल्लो. एनसीबीन मार्च 2020 वर्सा माझलवाडो-आसगांव हांका छापो घालून ताका आनी हेर दोगांक अटक केल्ली.
कळंगुटे पुलिसांनी दाखल केल्ल्या गुन्यांवात सत्र न्यायालयान ताका दोशी थारायला. 13 सप्टेंबराक सुनावणी जातकूच ताका ख्यास्त फर्मायतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
