भांगरभूंय | प्रतिनिधी
सोनाली फोगाट मरणाच्या प्रकरणांत परत एक फावट गोंयच्या मानगुटीवेल्या ड्रग्साच्या भुतान तकली वयर काडल्या. मात हे फावट जाल्ल्या फोगाट प्रकरणाक लागून खूब गंभीर प्रस्न उप्रासल्यात. गोंय बदनाम जालाच, ते कांय नवें न्ही. मात दर्यादेग वाठारांनी आशिल्लो ड्रग्स गोंयच्या गांवगिऱ्या वाठारांनी कसो पातळ्ळा हें सिद्ध जालां. ही गजाल गोंयच्या फुडाराचे नदरेन खूब चिंतेची आसा.
कसिनो, ड्रग्स, रेव्ह पार्ट्यो, दर्यादेग वाठार ते गोंयच्या मुखेल शारांनी मसाज पार्लरांच्या नांवान सुरू आशिल्लो अंदाधुंद शिंदळकी वेवसाय ही गोंयच्या पर्यटनाची गोंया भायर आशिल्ली वळख. घडये गोंयकारांची पर्यटनाची व्याख्या वेगळी आसत. मात, गोंया भायल्यान गोंयांत येवपी देशी आनी आंतरराष्ट्रीय पर्यटकांचे तकलेंत गोंयच्या पर्यटनाची हीच व्याख्या तयार जाल्या. ह्यो इतल्यो वायट गजाली सुरू आसतना आमी दुसरे वटेन गोंय देशाची पर्यटन राजधानी म्हूण बडायो मारतात. ह्या पोकळ बडायांक कितें अर्थ आसा? पर्यटनाक लागिल्ल्यो ह्यो किडी पयस करचे आदीं आमी गोंय देशाची पर्यटन राजधानी म्हणपाक शकतात? गोंयच्या सुदृढ पर्यटनाची छबी आमी देशांत आनी देशा भायर निर्माण करपाक शकतले काय? ह्या गजालींचेर सरकार आनी पर्यटनांतले हेर घटक खोलायेन केन्ना विचार करतले? ह्या प्रस्नांच्यो फकत जापो मेळोवन उपेग ना, तशी कृतीय जावप गरजेचें आसा.
फोगाट प्रकरणांत आनीक एक घटक परत एक फावट चर्चेन आयल्यात ते म्हणल्यार दर्यादेग वाठारांतले नायट क्लब. गोंयची देवभुमी अशीय वळख आसा. मात नायट क्लबांनी चलिल्लो कारभार पळयत जाल्यार देवभुमी कडल्यान गोंयचो भोगभुमीचे दिकेन सुरू आशिल्लो प्रवास दिश्टी पडटा. हणजूणचे जे कर्लीज क्लबांत सोनालीक ड्रग्स दिलें तो क्लब पयलीं सावन बदनाम आसा. हाचे पयलीं पुलिसांनी कर्लिसाचे वेटरां कडल्यान ड्रग्स जप्तूय केल्यात. 2008 वर्सा ब्रिटीश चली स्कार्लेट किलिंगाची कूड मेळचे पयलीं तें ह्याच कर्लिस क्लबांत गेल्लें. थंय ताचेर बलात्कार जाल्ल्याचे ताणें आपल्याक सांगिल्ल्याचो दावो ताचे आवयन केल्लो. उपरांत स्कार्लेटाच्या पोस्टमोर्टम रिपोर्टांत ताका ड्रग्स दिवन ताचेर बलात्कार
केल्ल्याची गजाल उक्ताडार आयिल्ली. कर्लिस आनी अशा हेर क्लबांनी चलपी ड्रग्सांच्या वेव्हाराचेर पुलिसांक आळबंद हाडचोच पडटलो. मात, वंयूच शेत खाता अशें जाले जाल्यार मात चलचें ना. आनी दुर्दैवान तशें घडटा.
सोनाली फोगाट प्रकरणांत सगळ्यांत हुस्क्याची गजाल म्हणल्यार गोंयच्या गांवगिऱ्या वाठारांनी पाविल्लो ड्रग्स. जो भुरगो हॉटेलांत सोनाली फोगटाचो रुम बॉय आशिल्लो तो सत्तरी म्हालांतल्या एका गांवगिऱ्या वाठारांतलो. फोगाटाचे पीए आनी ताच्या इश्टाच्या मागणे वेल्यान त्या रुमबॉयान आनीक एका ड्रग्स पॅडलरा कडल्यान ड्रग्स घेवन तांकां दिल्लो. ताका हे खातीर 12 हजार रुपया मेळिल्ल्याचें कळटा. हो रुमबॉय 23 ते 24 वर्सा पिरायेचो. ताची घरची परिस्थिती सामकी गरिबीची. घरांत तसो जोडपी कोण नाशिल्ल्यान अर्दवट शिक्षण सोडून तो अदमास 5 ते 6 वर्सां आदीं दर्यादेग वाठारांतले हॉटेलांत कामाक गेल्लो. उपरांत थंय हॉटेलांनी चलपी ड्रग्सांच्या वेव्हारांची ताका ल्हव ल्हव रुच लागली आनी तो तातूंत घुस्पलो. कांय वर्सांनी ताणें गांवांतल्या हेर दोग – तीग इश्टांकूय दर्यादेग वाठारांतल्या हॉटेलांनी कामाक व्हेले. उपरांत अदीं मदीं ड्रग्स घेवन येवप, हेर भुरग्यांक ते ओडून दाखोवप ह्यो गजाली अभावान येतल्योच. अशा मार्गान दर्यादेग वाठारांतलो ड्रग्स गांवगिऱ्या वाठारांनी पावला. मात दुर्दैवाची गजाल म्हणल्यार किरकोळ पयशांचे आशेन केल्ले हें कृत्य त्या गांवगिऱ्या भुरग्याचें आयुश्य काबार करपी थरलां. बरें त्या भुरग्याची घरची परिस्थिती आतां सुदारल्या अशें तरी आसा? ना, तशें अजिबात ना. हो फकत एक प्रकार. हेर मार्गांनीय गोंयच्या गांवगिऱ्या वाठारांनी ड्रग्स पावला.
गांवगिऱ्या वाठारांनी ल्हान भुरगे सोरो पिवपाचें, सिगार ओडपाचें प्रमाण हिसपा भायर वाडला. आनी ह्या भुरग्यांची पिराय 15 ते 20 वर्सां सकयल आसता. रातचे 12 ते 1 जाय मेरेन भुरग्यांचीं टोळकी गांवच्या कांय थारावीक सुवातींनी आसतात. अशा गांवच्या भुरग्यांक भंय घालपा खातीर पुलिसांनी रातचे गांवांनी पॅट्रोलींग करपाची गरज आसा. आदीं दर्यादेग वाठारांनी ड्रग्स पावला म्हूण सरकार आनी सरकारी यंत्रणा थंय भर दिताल्यो. मात, आतां गोंयच्या गांवगिऱ्या वाठारांनी पाविल्ले ड्रग्साचेर आळबंद हाडपाचें मोटें आव्हान यंत्रणां मुखार आसा. ना जाल्यार आमचे गांवचे गांव उद्ध्वस्त जातले. फकत भुरग्यांचे न्ही जाल्यार भुरग्यांच्या आवय- बापायंचेंय समुपदेशन जायत जाल्यार चड बऱ्याक पडटले.
विश्वनाथ नेने
9604039519
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.