भांगरभूंय | प्रतिनिधी
गांवच्या पंचायतीच्यो वेंचणुको जाल्यो. हे फावट गांवांत मात्शें वेगळेंच वातावरण आसलें. हे फावट सगळ्या नव्यांक वेंचून हाडपाचें गांवच्या तरणाट्यांनी थारायल्लें. कोणाक वेंचून हाडपाचो हें मतदारांनी थारावपाचें. पूण, वेंचणुकेक उबो रावतल्याक म्हणून कोणाच्यान आडावं येता? नव्या वांगडाच पोरण्यांनीय फॉर्म भरिल्ले. खुशाली पोरण्यांतलो एक. फाटलीं पंदरा वर्सां तो वेंचून येतालो. वेंचून येतकूच कितें दिवे लायतालो ताकाच खबर. दर फावट ताका उडोवपाचें थारतालें तरी कसोतरी तो वेंचून येतालो. म्हाजे फाटल्यान देव आसा अशेंच सांगतालो तो सगळ्यांक.
वेंचणुकेच्या दिसांनी तो सगळ्यांच्या घरांनी वचून नाक रगडून येतालो. आपूण वेंचून आयल्यार अमकें करतलों आनी तमकें करतलों म्हणपाचें तो सगळ्यांक सांगतालो. आपणांक गांवचो विकास जाल्लो जाय म्हणपाचें पालुपद तो गायतालो. वेंचून येवन तो कितें करतलो हें सगळ्यांक खबर आसलें. ताचो व्हडलो बरो बंगलो पळेल्यारूच ताणें आजवेर कितें केलां तें कोणाच्याय लक्षांत येवचें. इतलें करुनूय ताची हाव काय सूट नासली. दर वेंचणुकेक तो उबो रावतालो आनी वेंचून येतालोय बी. ताणे गांवचो विकास जरी केलोना तरी आपल्या कार्यकर्त्यांक मात तो सांबाळून दवरतालो. वेंचणुके वेळार तर तांकां सूर – रोंट आसतालेंच.
पूण हे फावट ताची धडगत लागतशी दिसनासली. नव्या तोंडाक संद दिवंया म्हणपाचें सगळेच उलयताले. चड करून पोटा खातीर देशा भायर गेल्ल्या तरणाट्यांनी तर सर्त लायिल्ली म्हणल्यार जाता. कांय बोटलेरूय वेंचणुकेक उबे राविल्ले. बोटलेंरांच्यो जायत्यो समस्या आसल्यो. ताणीं त्यो आपले संघटणेवतीन जायते फावट सरकारा मेरेन पावयल्ल्यो. पूण अजून तरी तांकां समाधान मेळूंक नासलें. देखून आपलो कोणतरी पंच सरपंच जालो जाल्यार सरकाराचेर दबाव हाडूंक जातलो म्हणून कांय कडेन तारवटीच उबे राविल्ले. तांतलोच एक खुशालीच्या वाड्यार आसलो. बोटलेरां फाटल्यान कार्यकर्त्यांची व्हडली रांग आसली. म्हणटकूच हे फावट खुशालीचें कांयच खरें ना म्हणपाचें सगळ्यांक पयलींच कळिल्लें. तांचो प्रचार सामको नेटान चलतालो. तसो खुशाली कितें वोगी बसूंक नासलो. तोय आपले परीन प्रचार करतालो. निमाणें देव आपल्या फाटल्यान आसा आनी देवाक जाय तेंच जातलें म्हणपाचें लोकांक सांगतालो.
प्रचार सोंपलो, वेंचणुको जाल्यो. दुसरेच दिसा निकाल जालो आनी अजाप म्हणल्यार खुशाली वेंचून आयलो. खरें म्हणल्यार स्वता खुशालीक हे फावट आपूण वेंचून येतलों हाची खात्री नासलीच. देखून तो निकालाक लेगीत वचूंक नासलो. भायर व्हारांदार बशिल्ले कडेन कोणेतरी धांवत येवन ताका ही खबर दिली. कांय वेळ ताचो विश्वास बसलो ना. पूण, खबर खरी म्हणपाचें ताच्या कार्यकर्त्यांनी सांगतकूच तो धांवतूच थंय पावलो. आतां खुशाली कसो वेंचून आयलो हें कोणाकूच कळ्ळें ना. देव खर्यांनीच ताच्या फाटल्यान आसा म्हणपाचें लोकांक मानचें पडलें. खुशाली वेंचून आयलो हाचे परस रासभर कार्यकर्ते घेवन भोंवपी तारवटी कसो पडलो हाचेंच सगळ्यांक अजाप जाल्लें. स्वता त्या तारवट्याक लेगीत अजाप जाल्लें. ताणें अशें कशें घडलें हाचो सोद घेवचो यत्न केलो आनी ताचो आवरोच उडलो.
तर जाल्लें कितें, ताचे कार्यकर्ते चार बुकां शिकिल्ले लोक. आतां शिकिल्ले म्हणून केन्ना बोटलेर, तारवटी असलीं उतरां वापरतात? ताणीं आपल्या तारवटी भावाक खलाशी म्हणूंक सुरवात केली. खलाश्याक मत दियात म्हणून ते गांवच्या लोकांक विनोवंक लागले. गांवच्या जाणटेल्यांक खलाशी कितें तें थोडेंच खबर. ताणीं खलाशीचो खुशाली केलो आनी मत खुशालीक मारलें. खुशालीक देव पावलो. खुशाली खुशाल. बाबड्या तारवट्यान कपलार हात मारलो.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
