भांगरभूंय | प्रतिनिधी
त य जाली, चवथ जाली…. आनी पंचमूय. म्हयनोभर परबेची उमळशीकेन वाट पळोवप, घरदार शेणान सारोवन निव्वळ करप, घराक रंग, चुनो फासप, बोंदेरां, मखरां, पीकपीक लायटी, माटोळेची तयारी…. सगळे उमेदीन करप. तो पयरूच आयिल्लो आनी रोखडोच गेलो. (कांय जाणांगेर आयतार, मंगळार मेरेन आसतलो.) एकेकदां मनाक दिसता, ताका घोड्यार बसून येवपा- वचपा जाय जाल्यार तो येता तरी किद्याक?
पंचमी दीस सकाळच्यान गणपती, मखराची आरास आनी गणपती मुखार केल्ले एका परस एक सोबीत देखावे पळोवपाक आमी वाड्या वाड्यांनी भोवले. वाड्या वयले इश्ट, वळखीचे, शेजारी- पाजारी आमगेर आयले. इस्पिकांचो डाव जालो, बायलांनी फुगड्यो घाल्यो, नेवर्यो, मोदक नाका आसतनाय पोटभर रगडले…. आनी केन्नाच तिनसांज जायत आयली……
भटमामान सात वरांचेर उत्तर पुजेक येतां, मागीर रोखडेच गणपती पावोवपाक सुरु करया म्हणिल्लें. सगळ्यांचे पायता म्हणसर रातचीं दोन- अडेज जातलीं. भजन, दिंडी करता म्हणसर एकवेळ फांतोडय जावंक शकता…. एकलो सांगतालो! साडे- स वरांचेर सगळ्या घरांतले लोक घुमटां आरती करपाक आनी गणपती पावपाक एकठांय जातात. एकामेकांगेर वतात आनी उपरांत दरेक घरांत एक दुखदिणे चित्र पळोवपाक गावता. जालें तशेंच. ते चित्र म्हणल्यार….
…..सात ते मध्यानरातीं बारा- दोन जाय मेरेन सगळ्या घरांनी म्हातारे, जांकां चलपाक, भोंवपाक येना अशे मेजकेच लोक…. दरेकल्याच्या घरांत आशिल्ले. तांचें एकूच काम. भटजीची आनी आरती करप्यांची वाट पळयत बसप. हातूंत जाण्टीं बायलां, दादले, हांचो आसपाव…. ह्या जांणट्या मनशांक फुगड्यो घालीन दिसता, पत्ते कुटीत बसन दिसता, घुमट, शामेळ, पखवाज, झांज वाजयन दिसता. तांकां अभंग गायन दिसता, गवळण म्हणीन दिसता. दिंडी, गजराच्या धुंद तालार आपले पाय थीरकयन दिसता, रातभर बल्कावाचेर बसून खबरो मारीन दिसता. पूण….
….. पिराय जाल्ल्यान तांचे शरीर तांकां साथ करीना. केन्ना दोळे पेंगपाक लागतात, हें कळना. मुगा गांठी, पुरयो, तळिल्ल्यो मिरसांगो, खानवड, सोजी.. सगलें खायन खायन दिसता. पूण तांचें पोट तांकां तेंको दिना. फुडल्या वर्साची चवथ आपणाक दिसत काय ना, हाची तांकां शास्वती नासता.
आरती पंगड ये मेरेन हे लोक देवा कडे शून्य नदरेन पळयत बसतात… मनांतल्या मनांत मागणें मागीत. देवाक सांगतात, म्हाका हांथरुणार उडोवं नाका. चलता- भोंवतां घेवन चल. म्हज्या फाटल्यान ह्या घरांतल्या लोकांचेर तुजो सदांच आशिर्वाद आसुंदी. दर वर्सा तांच्या हातान तुजी सेवा घडची. तांकां बरी भलायकी दी.
शरीर थकिल्लें आसता. तांची न्हिदेची वेळ जावन गेल्ली आसता. मध्यान रातीचीं इकरा- साडे इकरा जातात आनी हीं जाण्टीं मनशां, गणपतीचें विसर्जन जावचे पयलींच न्हिदेच्या अधीन जाल्लीं आसतात… बशिल्ल्या जाग्यार न्हिदुन पडटात. ती बद्द फाल्यां सकाळीं जागी जातलीं. तेन्ना गणपती बाप्पा आपल्या घरा पाविल्लो आसतलो……धर्तरे वेल्यो बर्यो- वायट गजाली आपल्या आई- बाबाक सांगता आसतलो….
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
