भांगरभूंय | प्रतिनिधी
सांगें : सांगें मतदारसंघांतल्या रिवण बाजारांत सकाळीं 8.30 वरांच्या सुमाराक 6 दुकानांक उजो लागून दुकानांतल्या सगल्या सामानांचो गोबर जालो. हे दुर्घटणेंत लाकांनी रुपयांचें लुकसाण जालां. कुडचडें उजो पालोवपी दळाच्या जवानांनी व्हड कश्टान उज्याचेर नियंत्रण मेळयलें आनी पालोवपाक येस मेळयलें.
रिवण बाजारांत एके ओळींत आशिल्ल्या एका भुसारी दुकानांत शॉर्ट सर्कीट जावन उजो लागलो आनी तो सगले कडेन पातळ्ळो. ताका आगून त्या दुकानां सयत आनीक एक भुसारी दुकान, दोन हॉटेलां, एक सोऱ्याचें दुकान, एक इन्सुरन्स कंपनीच्या ऑफिसा सयत स दुकानांचो गोबर जालो. हाका लागून लोकांक मेळपी सुविधा नश्ट जाल्या.
हाचे आदीं भुसारी सोसायटींत उजो लागून खूब लुकसाण जाल्लें. फाटोफाट आतां स दुकानांचो गोबर जाल्ल्यान तीं परतून चालू जाय मेरेन लोकांक त्रास सोंसचो पडटलो, हें निश्चीत.
सोमारा सकाळीं भुसारी दुकानांत उजो लागलो तेन्ना दुकान बंद आशिल्लें. दुकानांतल्यान धुंवयर भायर येता तें पळोवन लोकांनी दार फोडून दुकान उक्तें केलें. त्या वेळार उज्यान आकांताचें रूप धारण केल्लें. उज्यान चडूच पेट घेतलो तेन्ना दुकानाच्या दोनूय वटांनी आशिल्ल्या हॉटेलांनी उजो पावलो. तेन्ना पंच उमेश वेळीप हांणी उजो पालोवपी दळाक फोन करून कळयलें. उजो पालोवपी दळाचे बंब ताकतिकेन घडणुकेचे सुवातेर पावले आनी उजो पालयलो.
मंत्री सुभाष फळदेसाय हांणी सांगलें, रिवण बाजारांतल्या स दुकानांक उजो लागून एक व्हड संकश्ट दुकानकारांचेर आयलां. तांकां योग्य ती मजत दितले आनी आदले भशेनूच थंय परतून बाजार फुलतलो.
सरपंच वैशाली नायक हांणी सांगलें, हाचे आदीं हेच सुवातेर भुसारी सोसायटींत उजो लागून सामानांचो गोबर जाल्लो. तां दुसरें संकश्ट आयिल्ल्यान दुकानकारां वांगडाच लोकांक लेगीत त्रास सोंसचो पडटलो. तांकां मजत करपाक आपूण यत्न करतली. आदले जिल्हो पंचायत वांगडी सुरेश केपेकार हांणी सांगलें, हॉटेलां, भुसारी दुकानां आनी इन्शुरन्स ऑफीस आशिल्ल्यान लोकांक बरी सुविधा मेळटाली. उजो लागिल्ल्यान तांकां लाखांनी रुपयांचें लुकसाण जालां. तांच्या आदारा खातीर आमी फुडें आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
