फिफा वर्ल्डकप निमाण्या पांवड्यार

भांगरभूंय | प्रतिनिधी

० फिफा वर्ल्डकप 2026 आता खंयच्या पांवड्याचेर पावलां?
ही सर्त आतां सामकी अटीतटीची म्हणटात, तशी जाल्या. ती उपांत्य फेरींत पावला. 48 पंगडां मदीं सुरू जाल्ले हे सर्तींत आतां फकत चार पंगड उरल्यात. देखून ‘करो या मरो’ अशी परिस्थिती आसा.

० उपांत्य फेरयेंत खंयचे पंगड आसात?
अंदूंचे सर्तींतले उपांत्य फेरयेंत ‘फ्रान्स, स्पेन, इंग्लंड आनी अर्जेंटिना’ हांणी सुवात मेळयल्या. हातूंतले फ्रान्स (दोन फावटी) आनी अर्जेंटिना (तीन फावटी) हे आदले वस्ताद, जाल्यार स्पेन आनी इंग्लंडूय एकेकदा जिखल्यात.

० निमाण्या चार पंगडां मेरेनचो प्रवास कसो जालो?
उपांत्य फेरी गांठपा खातीर ह्या पंगडांनी उपांत्यपूर्व सामन्यांनी बरी कामगिरी केली. दुसरे वटेन, ब्राझील, पुर्तुगाल, बेल्जियम, मोरोक्को आनी नॉर्वे सारक्या पंगडांचें आव्हान सोंपलें. हाचे वयल्यान सर्तींत खंयचीच मॅच एकतर्फी नाशिल्ली, हें स्पश्ट जाता.

० 2026 चो वर्ल्डकप कित्याक इतिहासिक थारला?

• पयलेच फावट 48 पंगड वांटेकार जाल्यात.
• सर्तीचें आयोजन अमेरिका, कॅनडा आनी मेक्सिको ह्या तीन देशांनी मेळून केलां.
• देखून चड सामने, चड प्रेक्षक आनी व्हड प्रमाणांत अर्थीक उलाढाल पळोवपाक मेळ्ळी.
• नव्या पंगडांकय व्हड पंगडां आड खेळपाची संद मेळ्ळी.

० फायनल मॅच खंय जातली?
फिफा वर्ल्डकप 2026 ची निमाणी मॅच अमेरिकेंतल्या न्यू जर्सी/ न्यू यॉर्कच्या मेटलायफ स्टेडियमांत (जाका फिफा ‘न्यू यॉर्क न्यू जर्सी स्टेडियम’ म्हणटा) जातली.

० कितले लोक मॅच पळोवपाक येतले?
ह्या स्टेडियमाची तांक सुमार 80,663 प्रेक्षक बसपाची आसा. देखून फायनल मॅचीक 80 हजारांच्या आसपास फुटबॉल चाहते हाजीर रावतले.

० तिकेटीचे दर (भारतीय मोला नुसार) कशे आसात?
अधिकृत प्लॅटफॉर्माचेर तिकेटीचे मूळ दर $60 (सुमार ₹ 5,000) सावन सुरू जाल्ले. पूण सीट कॅटेगरी आनी मागणी प्रमाण अधिकृत दर $1,550 (सुमार ₹ 1,30,000) मेरेन आसात. ओपन मार्केट आनी रिसेल मळाचेर व्ही.आय.पी तिकेटींचे दर $10,990 (सुमार ₹ 9,15,000) वयर पावल्यात.

० इनामाची रक्कम कितली?
फिफान इनामाच्या रक्कमेत व्हड वाड केल्या. वस्ताद पंगड : $50 दशलक्ष (सुमार ₹ 417 कोटी), उपवस्ताद पंगड : $33 दशलक्ष (सुमार ₹ 275 कोटी)
फिफा वर्ल्डकपांत गोल्डन बूट (सगळ्यांत चड गोल मारपी), गोल्डन ग्लोव्हज (बरो गोलकी) आनी गोल्डन बॉल (बरो खेळगडो) ह्या वैयक्तीक पुरस्कारां खातीर रोख रक्कम मेळना. ते बदली ट्रॉफी वा करंड दितात. पूण हे मानाचे पुरस्कार जिखले उपरांत खेळगड्यांक तांच्या स्पॉन्सर्स आनी राष्ट्रीय फुटबॉल संघा कडून कोट्यांनी रुपयांचो बोनस मेळटा.

० मॅचींचं वेळापत्रक (भारतीय वेळे प्रमाण)
फ्रान्स आड स्पेन (उपांत्य फेरी) मंगळार, 14 जुलयाक रातीं साडेबारांक.
इंग्लंड आड अर्जेंटिना बुधवार 16 जुलय, रातीं साडेबारांक.
तिसऱ्या क्रमांका खातीर, शेनवार 18 जुलय, मध्यानरातीं अडेजांक (आयतारा फांतोडेर)
फायनल मॅच आयतार 19 जुलय रातीं साडेबारांक

० भारतांत मॅची खंय पळोवपाक मेळटल्यो?
टीव्ही : डीडी स्पोर्ट्सचेर उपांत्य फेरयेच्यो दोनूय मॅची आनी फायनल लायव्ह दाखयतले.
लाईव्ह स्ट्रीमिंग : जिओहाॅटस्टार अॅप आनी वेबसायटीचेर ह्यो सगल्यो मॅची लायव्ह दिसतल्यो.