भांगरभूंय | प्रतिनिधी
मुख्यमंत्री : मावंट आबूंत परिशदेचें उक्तावण
भांगरभूंय । प्रतिनिधी
पणजी : जिवितांत आध्यात्मिकता आसल्यार आत्मीक थिराये सयत समाजाच्या हिता खातीर व्यापक आनी संतुळीत निर्णय घेवपाक मजत जाता. हाका लागून भौशीक वाठारांत वावुरपी मनशा कडेन आध्यात्मिकता आसप गरजेचें थारता, अशें मुख्यमंत्री डॉ. प्रमोद सावंत हांणी सांगलें.
मावंट आबूंत (राजस्थान) ब्रजापिता ब्रह्मकुमारी मुख्यालयांत शांतिकायेच्या समाजा खातीर राजकारणांतली आध्यात्मिकता ह्या विशयाचेर परिशद जाली. हे परिशदेचें उक्तावण मुख्यमंत्री डॉ. प्रमोद सावंत हांचे हस्तुकीं जालें. भारतीय आनी नेपाळचे राजकी फुडारी, अधिकारी आनी विचारवंत हे परिशदेंत वांटेकार जाल्यात. परिशदेच्या उक्तावणा खातीर मुख्यमंत्री डॉ. प्रमोद सावंत शुक्रारा रातीं मावंट आबू पावले.
भौशीक वाठारांत वावुरपी मनशाक वा समाजीक सेवे खातीर नैतीन मुल्यां, आध्यात्मिकता आनी समाजकार्याची उमेद हांची सांगड घालप गरजेचें आसता. ह्या तिनूय गजालींचो संगम भौशीक वाठारांत वावुरपी मनशा कडेन आसपाक जाय. आध्यात्मिकतायेक लागून आत्मीक थिरताय आनी शांतिकाय मेळटाच, हे भायर दयेची भावना तयार जावन समाजाच्या हिता खातीर संतुळीत निर्णय घेवपाची तांक प्राप्त जाता, अशें मुख्यमंत्री डॉ. सावंत हांणी सांगलें.
समाजांत शांतिकाय निर्माण करपा सयत राजयोग ध्यानधारणा, जिवितांतली नैतीक मुल्यां आनी समाजीक एकचार निर्माण करपा खातीर ब्रह्मकुमारीचें मोलादीक योगदान आसा. राजकारण करतनाच शांतिकाय आशिल्लो समाज आनी निसुवार्थी समाजीक वावर करपाक ही परिशद उर्बा दिवपी थारतली, अशी आस्त मुख्यमंत्री डॉ. सावंत हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
