भांगरभूंय | प्रतिनिधी
विज्ञान अशे भाशेंत लोकां मेरेन पावता जी भास तांकां समजता आनी जे भाशेचेर तांचो विस्वास आसा, तेन्ना त्या भाशेच्या समाजा भितर विज्ञानीक नदर आनी विचारसरणी फुलता. देखून कोंकणी भाशेंत विज्ञानीक आनी शास्त्रीय विचार प्रगट करपी साहित्याचो विकास जावप, ही फक्त एक साहित्यीक गजाल न्हय तर शिक्षणीक आनी बौद्धीक गरज. कोंकणी भाशेचें साहित्यीक दायज आयज गिरेस्त आसुनूय, हे भाशेंत विंगड साहित्यप्रकारांचे तुळेन विज्ञान संबंधीत संकल्पना उजवाडाक हाडपी साहित्याप्रकार मर्यादीत आसा. परिणाम स्वरूप, मांयभाशेंत गिन्यान प्रसाराच्या संदींचेर मर्यादा येतात.
विज्ञानीक विशय वस्तू कोंकणी भाशेंत बरोवन प्रसारीत केल्यार कोंकणी भाशकांक विज्ञान विशयी गिन्यान मेळोवपाक सोंपें पडटलें कारण तेन्ना तांकां विंगड भाशेचेर (आनी ते भाशेचे संवकळीचेर) अवलंबून उरपाची गरज नासता. विज्ञान शिक्षणांतल्या सोदवावरासून अशें सातत्यान आमकां कळून येता की भोवभाशीक शिक्षणीक संदर्भांकडेन वचचे पयलीं मांयभाशेंत बुन्याद घालून मांयभाशेंत मुळाव्यो विज्ञानीक संकल्पना मांडल्यार विद्यार्थी त्यो संकल्पना अदीक प्रभावीपणान आत्मसात करून घेतात.
मुळाव्या शिक्षणांत हें खासा म्हत्वाचें आसता, कारण मुळाव्या शिक्षणांतूच शास्त्रीय आनी विज्ञानीक साक्षरतायेची, विमर्शीक आनी खोलनदरे विचाराची, विश्लेशणात्मक तर्क मांडणेची आनी म्हायतीपूर्ण निर्णय घेवपाची बुन्याद पडटा. तशेंच, विद्यार्थ्यांनी खाशेले इंग्लेज भाशेंत विज्ञानीक परिभाशांक तोंड दिवंचे पयलीं, जेन्ना ते शास्त्रीय आनी विज्ञानीक संकल्पनाकडेन मांयभाशेंतल्यान संपर्क सादतात तेन्ना तांचो आत्मविस्वास वाडटा आनी उपरांत ते चड सरळतायेन इंग्लेज परिभाशा स्विकार करून घेतात आनी समजून घेतात. अशें केल्ल्यान समावेशक अशें शिक्षणाक खूब आदार जाता आनी विद्यार्थ्यांचोय खूब आदार जाता.
शास्त्रीय आनी विज्ञान विशयी साहित्याचो विस्तार जाल्ल्यान भाशेच्या आधुनिकीकरणांतूय भर पडटा. प्रामाणीक (आनी सरळ-सोंपी) परिभाशा तयार करप, विज्ञानीक ग्रंथांचो आनी सोदवावरांचो अणकार करप, मूळ सोदवावर-लेख तयार करप हाका लागून जीवतंत्रगिन्यान, जीवरसायनशास्त्र, कृत्रीम बुद्धी, पर्यावरण शास्त्र, भौशीक भलायकी, अंतरिक्ष सोदवावर ह्या सारक्या थोड्या समकालीन विज्ञान-फांट्यांचो समावेश करून घेवप आमचे कोंकणी भाशेक शक्य जाता. अशे तरेची उतरावळ समृद्धी, कोंकणी भाशेची वेगळी सांस्कृतीक अस्मिताय तिगोवन दवरून जागतीक शास्त्रीय आनी विज्ञानीक संवादांत वांटो घेवपाची तांक घट करता, सुगूर करता.
ते भायर, कोंकणी भाशेंत विज्ञान प्रसारा निमितान पुराव्याचेर आधारीत गिन्यानाकडेन लोकांचो सहभाग वाडटा. भलायकी-सेवा, सैमीक आनी पर्यावरण बदल, शाश्वत शेती आनी तांत्रीक नवनिर्माण हांचे संबंधीत सुलभ म्हायती लोकांक आपलेच भाशेंत उपलब्ध आसल्यार ते विमर्शीकपणान मिथ्या-दाव्यांचें मुल्यांकन करूंक समक्ष जातात आनी जर कोणूय चुकिची म्हायती पसरायता जाल्यार ताका प्रतिकार दिवंकूय सशक्त जातात. ताका लागून, कोंकणींतलें शास्त्रीय आनी विज्ञानीक लेखन घटमूट करपाक विद्यापिठां, सोदवावरपी, शिक्षणतज्ज्ञ, उजवाडावपी, सरकारी संस्था हांचे मदीं सहकार्य जाय पडटा. शास्त्रीय गिन्यान सुलभ, शिक्षणीक नदरेन खर आनी अर्थपूर्ण उरता हाची खात्री करचीच पडटा वांगडाच तें लोकांमेरेन पावता की ना हाचीय खात्री करूंक जाय.
शशांक शणै
7022694191
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
