गोंय वेंचणुके खातीर तयार जाता

भांगरभूंय | प्रतिनिधी

एक राष्ट्र एक वेंचणूक कायदो मार्गाक लागचे आदीं एक राज्य एक वेंचणूक (पंचायत ते विधानसभा) घेवपा पासत वेंचणूक आयोगाची नवी रचणूक जातली?

गोंय विधानसभा वेंचणूक अंदूं वर्साचे अखेरेक जावंक शकता हें राजकी पक्षांक कळळां. मुखेल राजकी पक्षां बराबरीन संघटणा, प्रदेशीक पक्ष संघटणेचें बळगें वाडोवपाक लागल्यात. मतदान केंद्र समित्यां मेरेन मनीसबळ राजकी पक्षांक लागता. पक्षाचें वांगडीपद घेतना पयशे घेवन पावती दितात, वांगड्यांचो अणभव, पक्षा खातीर मुळाव्या वावरा वांगडा मतदारसंघांत लोकां मेरेन पाविल्ल्यांक उमेदवारी मेळ्ळी तरी जैत मेळटलें अशें न्हय. समाज, धर्म, जाती कातीक आयजय राजकारणांत म्हत्व आसा. विधानसभा वेंचणुकेंत उमेदवारी दितना ताचोय विचार जाता. गावडा, कुणबी, धनगरांच्या राजकी आरक्षणांतल्यान मतदारसंघांची गणितां बदलतलीं. आरक्षण एकाच धर्मापुरतें आसचें ना हाची जतनाय घेवची पडटली. सगल्या धर्मांनी आदिवासी समाज आसा, तातूंत गिरेस्त आसात. आदिवासीच्या आरक्षणात अस्तुरी आसची, तिचे खातीर वेगळी तजवीज जातली? मुळाव्या आरक्षणांत तिचो वांटो आसतलो? दोन म्हयन्यां भितर तें कळटलें.
वेंचणूक लागीं येतना मुखेल वेंचणूक आयोगान राज्यांत वेंचणुकेच्या कामकाजांत आस्पाविल्ल्या अधिकाऱ्यांच्यो बदल्यो करपाक आरंभ केला. वेंचणूक आयोगाच्याअधिकाऱ्यांनी मतदान यंत्रां तपासपाक घेतल्यांत. नगरपालिका, विधानसभा वेंचणुकां खातीर मतदान यंत्रां आसतलीं? मतदान यंत्रां हेर राज्यांतल्यान गोंयांत येतलीं? नवीं मतदान यंत्रां आयोग विकतीं घेतलो? वेंचणुके पासत अर्थीक तजवीज सरकार करता, राजकी पक्षांकय अर्थीक मांडावळ करची पडटा. वेंचणुकेंत देंवपाची इत्सा आशिल्ले उमेदवारी मेळोवपाक पयशे पक्षाक दिल्यार तांकां रिसीट मेळची. आडवाटेन उमेदवारी मेळोवपाक बेकायदो पयसो दिल्यार घेवपी, दिवपीय गुन्यांवकार थारतलो.
वेंचणूक लागीं येतना उमेदवारी मेळोवपा पासत पयशे दिल्यात हे आरोप काँग्रेस पक्षांत देश ते राज्य पांवड्यार जाल्यात. जांचेर आरोप जाले ते मंत्री, मुख्यमंत्रीय जाल्यात, राजकारणांतल्यान पयस गेल्यात. एक राष्ट्र एक वेंचणूक कायदो जातना पक्षांतरांच्यो नव्यो वाटो, पक्षाच्या पांवड्या वयल्या पयशांच्या वेव्हाराची अभ्यास जावपाची गरज उप्रासता. एक राष्ट्र एक वेंचणूक कायदो मार्गाक लागचे आदीं एक राज्य एक वेंचणूक (पंचायत ते विधानसभा) घेवपा पासत वेंचणूक आयोगाची नवी रचणूक जातली? कर्मचारी भरती स्वतंत्र आसतली? विधानसभा वेंचणुकेचे तयारेक नेट आयिल्लो आसतना एक राष्ट्र एक वेंचणूक संसद अभ्यास पंगड गोंयांत येता. उगते माचयेर पंगड वतलो? राज्यांतल्या मतदारसंघांची फेररचणूक करपा पासत आयोगाची बांदावळ जाल्यार भौशीक भासाभास (हियरींग) जावची पडटली.
विधानसभा वेंचणुकेंत कोण आसतलो? खंयच्या पक्षांतल्यान? मतदारसंघांत? ते अणभवी? तांचो वेवसाय? ह्या प्रस्नाच्यो जापो मतदारांक कळटात तेन्ना मतदारांच्यो अपेक्षा तांकां खबर आसतात तें सोदून काडपाची गरज आसा.
वेंचणूक लागीं येता तेन्ना पयलीं वेंचणुकेंत, राजकारणांत आशिल्ले जागे जावंक लागल्यात. मोन्यांनी समाजा पासत वावुरपी तातूंत आसात, समाज एकठांय आसल्यार भौसंख्येन आशिल्ल्या समाजाच्या वावुरप्यांक वेंचून येवप शक्य आसा.
काल गोंयच्या राजकारणांत आशिल्ल्या घराब्यांतले शिक्षणांत फाटीं आशिल्ले वेंचणूक जिखले. गोंय शिक्षणांत मुखेल करून उंचेल्या शिक्षणांत फुडें पाविल्ल्यान शिकिल्ल्या आदिवासींक सगल्या राजकी पक्षाचीं कवाडां उक्तीं आसतलीं. आरक्षणा बगर आदिवासी, बायलां वेंचून येवपाक शकतात ही क्रांती आयज गोंयांत शिक्षणांतल्यान जाल्या. नव्यो येवजण्यो रोखड्यो चालीक लागल्यार अंदूंच्या विद्यार्थ्यांक ताचो लाव मेळटलो.
गोंयांत फाटल्या वीस वर्सांत जाल्ले बदल, ते हाडपाक जापसालदार कोण? ताची जाणविकाय मतदारांक आसा. गोंयचो शिकिल्लो मतदार सोंपेपणान उद्देग, वेवसायांत सोदता, नवी दिका तांकां दाखोवपाक जाय.
सरकार खंयच्याय राजकी पक्षाचें आसूं गोंयची सवस्तकाय इबाडची न्हय हेखातीर वावुरपी मतदार आसतले. मतदार, थळाव्यां मेरेन पाविल्ल्यो बऱ्यो येवजण्यो सत्तेंत आयिल्ले खंयचेंय सरकार बदलचें ना हें मत मारतना जतनाय घेवची पडटली. सरकार ही सेगतची प्रक्रिया आसता. वेंचणूक लागीं येतना कोण हेवटेन तेवटेन वतात, पयलींच्यो येवजण्यो नव्या रुपांत कश्यो येतात तें मतदारांक खबर आसा.
देशांतल्या व्हड राज्यांतल्यो वेंचणुको वेगळ्यो, मतदार वेगळे. अळम्यावरी फक्त वेंचणुके तेंपार राज्यांत येवपी राजकारण्यांनी तें मतींत घेवचें.
फाटल्या विधानसभा वेंचणुकेच्या तेंपार गोंयांक बरे दीस दाखयतली अशी आस्त आशिल्ल्या रिव्होल्युशनरी गोवन्स पार्टींतलो उजो कोण पालयतलो? एक आमदार वेंचून येतना पक्ष व्हड जातलो अशें सांगपी अध्यक्ष पक्षांतल्यान भायर सरला तें कित्याक? जाप फुडारांत मेळपाची शक्यताय उणी आसा. आमदार विरेश बोरकार, जिल्हो, पंचायत पांवड्यार राजकारणांत आशिल्ले आरजीपी वांगड्यांक एकठांय करपी मुखेली मेळपाची शक्यताय ना. ते हेर राजकी पक्षांत वचूंक शकतात. ‘भांगरभूंय’त आदीं बरयिल्ले प्रमाण वेंचणूक लागीं येतना कार्यकर्ते हेवटेन तेवटेन वचप जावंक लागलां.
प्रदेश काँग्रेसीचे नवे कार्याध्यक्ष सुनील कवठणकार हांकां फुडल्या पांच वर्सांत पक्षाची वेगळी बांदावळ करची पडटली. पक्षाक नवें कार्यालय मेळोवन दिवपाची जापसालदारकी कोण घेतलो? पक्षाचे आदले अध्यक्ष अमीत पाटकार हांणी फाटले विधानसभा वेंचणुकेंत बरीं मतां मेळयिल्लीं. त्याच मतदारसंघांत एकचित्त जावन वावुरचें, जिखचें हे खातीर तांचें अध्यक्षपद काडून घेतलें हाची जाणविकाय तांकां अजून जावंक ना. तांच्यो हेर मतदारसंघांतल्यो भोंवड्यो, कार्यावळींचेर नदर दवरतल्यांक ते नवो राजकी पक्ष काडटात हें कळटलें. तांचे परस प्रदेश काँग्रेस अध्यक्ष गिरीश चोडणकार पिरायेन, अणभवान वरिश्ठ. राजकारणाची नवी भास देश पांवड्या वयल्या राजकारणांतल्यान ते शिकल्यात. प्रदेशाध्यक्ष म्हणून तांचे मुखार आव्हानां आदले वरींच आसतलीं. हेर राज्यांतले वेंचणुकेची जापसालदारकी तांचेर येतली तेन्ना सुनीलाक पक्ष सांबाळचो पडटलो. काँग्रेसीच्या विद्यार्थी फांट्यातल्यान सरचिटणीस आनी आतां कार्याध्यक्ष मेरेन राजकारणांत वावुरतना तांकां मतदारसंघांची, समाजाचीं गणितां बदलतात तें अंदूंचे वेंचणुकेंत कळटलें.
अॅड. श्रीनिवास खलप सरचिटणीस जावंक शकतात? कोण घेतलो जापसालदारकी प्रदेश काँग्रेस सरचिटणीसपदाची? राजकारण्यांची दुसरी पिळगी प्रदेश काँग्रेस पांवड्यार तयार जाता तेन्ना राज्यांत भाजपान फुडलें नेतृत्व घडयलां, नवें कार्यालय गोंयांत पक्षा खातीर जाता. नवी युवा पिळगी गोंयच्या राजकारणांत येवप गरजेचें आसा. ते पिळगेंत घराब्यांतलेय आसतले, तांकां जैत मेळटलें? दोन वर्सां जैता पासत खांची कोनशांनी मतदारसंघांत भोंवचें पडटा, घरकान्नींक वांगडा घेवन.
प्रदेशीक पक्षांच्या अस्मितायेचें हें झूज, कालचे प्रस्न नासले तरी नवीं संकश्टां येवंक शकतात. बदलपी राजकारणाच्या जाणविकायेंतल्यान महाराष्ट्रवादी गोमंतक पक्ष, गोवा फाॅरवर्डाक राज्याच्या फुडाराचें चिंतचें पडटलें. झुजा पांवड्यार तयारी जाता सादूर रावचें.

सुहासिनी प्रभुगांवकार
9881099260