भांगरभूंय | प्रतिनिधी
मडगांव: साश्ट म्हालांतल्या बेताळभाटी वाठारांतल्या 85 वर्सा पिरायेच्या ज्येश्ठ नागरिकाक ताच्याच पुतान आनी सुनेन घरांत खर मारपेट केली. पिडीत जाण्ट्याच्या लंडनांत रावपी चलयेन कागाळ केले उपरांत कोलवें पुलिसांनी पिडिताच्या पुता सयत सुनेचेर गुन्यांव नोंद केला.
बेताळभाटी राणेवाडो वाठारांत ज्येश्ठ नागरीक लोयोला डिसौझा हांकां घरगुती हिंसाचाराक सामकार वच्चे पडिल्ल्याची तिडक उक्तावपी घडणूक उक्तडार आयली. लंडनांत रावपी पिडीत जाण्ट्याचे चलयेन कोलवें पुलिसांक ई-मेली वरवीं धाडिल्ली कागाळ आनी घरांत लायिल्ल्या सीसीटीव्ही कॅमेऱ्याची फुटेज मुखार आयले उपरांत कोलवें पुलिसांनी ह्या प्रकरणांत गुन्यांव दाखल केला, ह्या प्रकरणांत पिडिताचो पूत इझिदोर डिसौझा आनी सून तेरेसा गोन्साल्वीस हांचे आड गुन्यांव नोंद केला.
कागाळदार चली मारिया डिसौझा हिणें लंडनांत रावन कोलवें पुलिसांक दिल्ले कागाळीत म्हणलां की, 8 जुलय दिसा सकाळीं 9 ते दनपारां 2 वरां मजगतीं तांच्या बेताळभाटी हांगासरल्या घरांत तांचे 85 वर्सा पिरायेचे बापूय लोयोला डिसौझा हांकां तांचो भाव इझिदोर आनी भावजय तेरेसा हांणी मारपेट केली. जाण्टो बापूय असहाय्य आशिल्ल्यान ते आपलो बचाव करूंक शकले नात. ह्या मारपेटीक लागून तांकां मानसीक धक्को बशला आनी ते भिरांतेन वावरत आसात.
लंडनांत रावपी मारिया हांणी घरांतली सीसीटीव्ही फुटेज तपासले उपरांत हो प्रकार मुखार आयलो. ह्या व्हिडियो फुटेजींत पूत आनी सून जाण्ट्या बापायक जोत्यांनी आनी हातांनी मारपेट करीत आशिल्ल्याचें दिसता. कागाळी उपरांत कोलवें पुलिसांनी ह्या प्रकरणाची गंभीर दखल घेवन दुबाविताक ताब्यांत घेतला आनी पुलीस स्टेशनार हाडल्यात. तशेंच दुबावितांचेर गुन्यांव नोंद केला. ह्या प्रकरणांत कोलवें पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
