भांगरभूंय | प्रतिनिधी
बायल गंभीर जखमी; वाठारांत भिरांतीचें वातावरण
पेडणें: पेडणें म्हालांतल्या मायण- कोरगांवां शुक्रारा सांजवेळा 6.30 वरां मजगतीं गव्यान दुचाकीक नेटाचो धपको दिल्ल्यान ज्युलिया कट्टमणी ही बायल गंभीर जखमी जावन तिचे तकलेक गंभीर दुखापत जाली. थळाव्या नागरिकांनी तिका खाजगी वाहनाचे मजतीन खाजगी हॉस्पिटलांत दाखल केल्या.
मेळिल्ले म्हायती प्रमाण ज्युलिया कट्टमणी ही बायल पेडणें सावन कोरगांवां मायण वाठारांतल्या आपल्या घरा दुचाकी वेल्यान वताली. ह्याच वेळार अचकीत शेजारच्या मळ्यांतल्यान एक गवो गतीन धांवून रस्त्यार आयलो आनी तिचे दुचाकीक नेटाचो धपको दिलो. धपको इतलो खर आशिल्लो की ती रस्त्यार शेंवटून पडली. ह्या अपघातांत दुचाकीचेंय व्हड प्रमाणांत लुकसाण जालां.
घडणुके उपरांत थळाव्या नागरिकांनी ताकतिकेन धांव घेवन जखमी बायलेक मजत करून हॉस्पिटलांत उपचारा खातीर दाखल केली.
मजगतीं, कोरगांव वाठारा सयत पुराय पेडणें म्हालांत गव्यांचो वावर दिसानदीस वाडत आसा. नागरिकां मदीं भिरातींचें वातावरण निर्माण जालां. दिसा उजवाडा गवे रस्त्यार येत आशिल्ल्यान वाहन चालकांक अपघाताचो धोको निर्माण जायत आसा. तशेंच चलून वचप्यांकूय जीव मुठींत घेवन प्रवास करचो पडटा अशें लोक उलयतात.
रानां खातें आनी सरकारान गव्यांच्या वाडट्या वावराचेर नियंत्रण दवरपा खातीर जाता तितले बेगीन उपेय येवजण्यो करच्यो. तशेंच अपघात टाळपा खातीर गरजेची सुरक्षा वेवस्था आनी प्रतिबंधात्मक उपाय राबोवचे, अशी नेटाची मागणी मगोचे फुडारी राजन कोरगांवकार आनी थळाव्या नागरिकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
