भांगरभूंय | प्रतिनिधी
पणजीः गोंय विद्यापिठाच्या हॉस्टेल मेसाच्या जेवणांत किडे सांपडिल्ल्या प्रकरणांत संबंदीत कंत्राटदाराक निलंबीत केला. ह्यान फुडें ताका परतून कंत्राट दिवचो न्हय म्हणून ब्लॅकलिस्ट केला. ह्या प्रकरणांत चवकशी समितीची नेमणूक जातली अशें विद्यापिठाचे रजिस्ट्रार सुंदर धुरी हांणी स्पश्ट केलें. शुक्रारा भारतीय जनता युवा मोर्चान हे संबंदी निबंधक कार्यालयांत ठीय्या आंदोलन केलें. ह्या वेळार कंत्राटदाराचेर खर कारवाय करपाची मागणी केली. हाचे उपरांत हो निर्णय घेतलो.
काल मेसच्या जेवणांत किडे मेळ्ळे अशें धुरीन सांगलें. हांवेय किडे पळयल्ले. ही घडणूक खरेंच दुर्दैवी आशिल्ली. हाचे उपरांत आमी काल कंत्राटदाराक कारण दाखोवपाची नोटीस जारी करून दंड घाल्लो. आयज सकाळीं बसका जाली. आमी विद्यार्थ्यांचे भलायके कडेन खेळपाक सोदना. देखून आमी कंत्राटदाराक कायमचो निलंबीत करून ताका ब्लॅकलिस्टांत घाला. विद्यापिठांतल्या हेर दोन कॅन्टीनांचें काम आमी थळाव्या स्वयम सहाय्यता गटांक दितले. हीं दोन कॅन्टीनां सोमारा सावन सुरू जातलीं.
कंत्राटदाराक काडिल्ल्यान कांय दीस मेस बंद उरतलें अशें तांणी सांगलें. पूण पयशे फारीक केल्ल्या विद्यार्थ्यांक अर्थीक लुकसाण जावचें न्हय हाची जतनाय घेतले. फुडल्या सप्तका मेरेन मेस चलोवपा खातीर नवो कंत्राटदार घेतले. ह्या प्रकरणांत कॅन्टीन समितीच्या वांगडी सचीवाकय कारण दाखोवपाची नोटीस जारी करतले. फुडाराक हॉस्टेल वार्डन, कॅन्टीन समितीच्या वांगड्यांक दर दिसा मेस, कॅन्टीनाक भेट दिवपाची सुचोवणी दितले. हांवेंय स्वता ह्या कॅन्टीनांत वचून ताची तपासणी करपाचें थारायलां.
भाजयुमोचे अध्यक्ष तुषार केळकार हांणी सांगलें, फाटलीं तीन वर्सां ह्या हॉस्टेलाच्या मेसच्या जेवणाच्यो कागाळी येतात. आमकां मेळिल्ले म्हायती प्रमाण स म्हयन्यां आदीं अन्न आनी वखदां प्रशासनान मेसचेर धाड घाल्ली. त्या वेळार कंत्राटदारान जायते नेम मोडिल्ल्याचें स्पश्ट दिसतालें. पूण विद्यापिठान ताचेर कारवाय करूंक ना. ह्या प्रकरणांत कॅम्पस समितीच्या वांगड्यांचीय चवकशी करची. आमचे खातीर राजकारणा परस विद्यार्थ्यांची भलायकी चड म्हत्वाची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
